Foto: Josip Fafanđel | Vršanova voda va dolnjoj Dragi
Ne pačan se kuliko smo to i sami zapazili, ali lipo je znat da je ovoga petka, 22. marča, Svitski dan voda. A ki je drugi to odredil nego Ujedinjene nacije. A mi Rabljani i otočani morali bi in bit na tomu zahvalni, kako ča zahvalni moramo bit i vodi bez ke nikoga ne bi bilo na ovomu svitu. Ali o tomu van neću pisat velu štoriju, nego ću van samo prenest ono ča san odavna već zapisal va monografiji našega Vrela ka se zove 50 godina u službi Rabljana i njihovih gostiju. Tu malu crticu ka jušto govori o vodi, krstil san neka se zove Voda i otok.
Evo ča san to napisal, prevedeno po domaću i uz zahvalu vodi ka nas je na ovomu našemu otoku i fermala.
– Otok i voda dvi su nerazdvojne i tuliko združene neminovnosti. Otok je zaokružen prostor i sve se je na začetku i moralo dogajat jušto na tomu malomu i stišnjenomu tramitu. Naša otočka povijest vodoopskrbe zapravo su prirodna vrila, lokve i bunari. Na Rabu se tekar puno potlije dogajaju nova bušenja i spasonosno peljanje vode od kopna.
Ni zato njanci malo čudnovato da su se ti mali izvori vode mogli kroz vrime nać i va našoj pučkoj literaturi, va usmeniman predajamin, oli neizbježnomu domaćemu sulacu. Pomalo je već legendarna i ona anegdota o pokojnomu Kamporcu, šaljivdžiji Antu Boljfaru, ki je jedno jutro i sam partil s kablan po vodu. Pun kabal vode stavil je na glavu, a Kamporac ga je kunrtal pa ga po domaću pozdravlja:
– Dobro jutro, Ante! Ča nosite vodu?
A Ante, vajk spreman za sulac, odgovara mu:
– Da, ma i kabal!
Ili, jednako je vridna, na sriću očuvana pučka pismica, ku je složil Dražanin, nažalost odavna pokojni Joso Fafanđel, zvani Posran (?), najvirovatnije krajen 19. vika. Pismica (ka ni baš ni mala) zove se Poslušajte rožice rumene, ali ljudi su je kroz čitanje i govorenje od ust do ust prekstili va Pismu o Vrulji. A ni to ni bez vraga, boj Vrulja je voda va dolnjoj Dragi, ka je uz Mlinicu va Gornjoj Dragi, pravi biser prirodnoga izvora ki je, a diboto pol sela nekad z vodon napijal. Tamo se je hodilo vazimat vodu, ali tamo se je i prala roba i napajalo blago, pa su to bila i mesta kadi su se ljudi kuntrivali, najviše oženjene ženske, dica, ali i još neoženjene divojke. Jušto zato se je i štorija od ove pisme dogajala na toj vodi ka se zove Vrulja. Evo zato i par redi od Pisme o Vrulji i to od samoga začetka:
Poslušajte rožice rumene
Kakove su supetarske žene
Kada one dođu uzet vodu
Pa na Vrulji sakupe se mnoge
Pa ti stanu rastresati momke
Mlade momke i mlade divojke…
Za virovat je da svako naše mesto na Rabu pameti jako puno dogajanja, anegdota i svakakovih zgoda i nezgoda ćapanih va naša otočka vrila ka su u to vrime zapravo značila život. Danas su neka od njih kaptirana za vodu i del su široke vodopskrbne mriže na otoku.
Jedan delić tih vod je i očuvano, ali, na žalost, puno od njih je zapušćeno i pomalo propdaju. I Vrulju je ta sudbina zatekla. Zadnje je vrime da in sviman, malo-pomalo, udahnemo novi život.
A ča se more, danas svi imamo vodu va kući, pa više ni potribe nosit je va ciglju i kablu, oli va žbanjicamin na tovaru peljat.
Piše: Joso Fafanđel za Kantunić, 22.4.2024.
