Foto: RabDanas
Domislil san se toga, boj evo, ovo su i dani od Sv. Martina, a ljudi to zovu Martinje. E, a jušto to da je i termin za vino pretočit, a unda i kuševat i kršćevat, dabome.
A masline, kuliko san mogal šervat, masline se još beru, pa su i uljare još va pogonu. Ni baš ove godine niki veli rod, ma jedni se isto falu da su skupili i po sto litar ulja. Da, ma drugi jopet govoru da nisu skupili ove godine ma njanci za par kili posolit. A ča triba i govorit kad san i ja jedan od tih. A nisu brate rodile i ča se tudi more. Onih par balic po kiticah molal san tićiman, neka i oni jadni malo kušaju. Njiman je i unako veća potriba nego namin. Mi imamo svemoguće vele butige kolo nas, a njihove su butige jedino okolo po vrtliman i gušćiman. I još in se mi i vato pačamo. Ma ja ne, ja san in sve molal navolju, pa in još jedino moren zaželit prijatno i dobar tek.
Ben, ma sada je štajun i od Martinja pa bi vino tribalo pretočit i s prijteljiman ga kuševat. Istešo, ma ja se isto bojin da puno od njih ni moglo trpit i čekat dan od Martinja. Govorin to zato boj me je već i do sada par od njih zvalo, da ala, neka dojden kušat njihovo mlado vino. A ča ću ga kuševat, govorin in ja, kada još ni Martinje arivalo. Otil san reć da to još ne more bit ono pravo vino. Ne more bit ni do Martinja kada se tobože kršćuje, a kamo li prvije. Vino je još gusto, mutno i slatko, ako je učinjeno kako triba.. Ma kako ne!, govoru mi ti ča me zovu na kuševanje, nit je moje vino mutno, nit slatko, nego jušto najbolje za pit.
E za pit je, mislin se ja, ma nač trači, je vino oli onaj slatki kiseliš
– Kušal san vino kod onoga tvoga prijatelja, govorin ja jednomu, i neka znaš da mi ni bilo po volji, a un se navelo fali kako mu je vino prava pravcata bumba
– Znan ja to, govori meni taj čovik, ono ča si kod njega kušal to je kiseliš, ali dojdi ti kod mene va konobu pa ćeš vit ča je vino. I još ću ti narizat malo lipoga špeka prije toga.
I jušto je tako i bilo. Zove un mene jedan dan i govori: Ala, špek je na tavli, a nadodal san još i zericu dobroga sira.
– Ne moren sada, govorin ja, boj je kod mene jedan čovik.
– To niš ne pači, govori un meni nato, nego ala, pa dojdite lipo oba dva.
A namin ni tibalo dva put reć, nego ala homo ća – gremo. Paroni dabome, to baš i ni bilo jako po volji i sada bi ja rekal da je diboto imila i pravo, boj smo mi tamo kod onoga, ne samo vino kuševali, nego smo malo i priko cente zeli vasebe. A ča to oće reć? Oće reć da je vino položilo ispit, i da su se žmulji mogli i šemprije va grlo spražnjevat. Oćo, ma veli spas je bil va onomu špeku i siru na pijatu, boj da toga ni bilo, arivali bimo mi doma ma šćeto grubo nakramani. Svi tri dabome, ne migo samo ja. I to još i prvije od Martinja.
- Joso Fafanđel, 9.11.2018.
