Foto: Iz obiteljske arhive Josipa Fafanđela
Pametin kako san ja na jednomu mestu rekal da će bit svega, boj da je tako vajk bilo i bit će. Rađat će se nova dičina pa ćemo se veselit, a puno od nas će, na velu žalost, od starosti, kakove nesriće oli vele bolešćine, poć i tamo gori na onaj drugi svit. Niš novoga. Od kad je svita vajk se nati mod dogaja.
Piše: Josip Fafanđel (iz arhive Rapskog lista br. 33, srpanj 2016.)
Ben ma, sve ono ča mora bit neka se dogaja va svoje vrime, a i godina neka kuri po svoju. Po svoju da, ma unako kako smo to mi jedni drugiman i zaželili, ne migo na drugi mod.
Jušto par dan potle pasane Nove godine kuntrivan ja va butigi moga znalca Joška Gulića, dal san mu ruku, a un mi govori uvako: “Želin ti sve najbolje i puno zdravlja! Ali znaš ča, uzato vajk triba zaželit, a baren i jednu malu zericu sriće, boj ako sriće ni unda zaman sve ono drugo.” A ja se potle mislin, ala šu – teško je danas i reć ča je to srića, ali kako je da je, ima Joško pravo. Boj reče se kako su i oni na onomu brodu Titaniku imili i zdravlja i veselja i puno šoldi, ali da su se nažalost isto potopili. Da, falila je još jedino ona zerica sriće. Oštija, a i na svakoj čestitki za Božić i Novu godinu pisalo je ne, veseli i bogati bili, nego sretni van blavdani! Istešo, ne reče se zaludu ono po domaću, da ki je sritan, ni straha – ni va kundotu neće bit gladan.
I tako za novo vrime duron jedni drugiman zaželimo puno sriće i zdravlja, a ono pasano kako da više i ni triba spominjat. Ma isto ni tako, boj i pasane godine se pametu, o njiman se i govori i piše makar su već partile zada nas. Tako je to sve od kad je čovik došal na ovaj svit i kada je počal prvi put po zemnlji oli stenju šarat crte i buduća slova. Unda smo naučili i govorit i pisat i čitat, a potle puno pasanoga vrimena evo kadi smo danas. Diboto još malo pa nan neće ni olovka bit za potribu, a govori se već kako nan za niko vrime neće više ni libri tribat. Sve će to raščint i debandat ova dananšnja nesrićna elektronika, ka je varamente još na začetku, ali za sto oli dvisto godin, učint će čuda i ki zna kadi i naki mod će sve ovo finit.
Nati mod se je začalo i ono kada je odavna već onaj Nobel zmislil dinamit, tobože ono pucanje zokin je otil pomoć ljudiman da se manje muču na veliman i teškiman posliman. A mi pametnjakovići smo unda i sebe i njega prevarili, pa zotin pucanjen nismo samo takali brizi i stenje razbijali, nego smo zmislili topi, puške i bumbe svake sorte, a sve to samo zato da moremo jedni drugih ubijat. Da, med dobro se vajk zamiša i ona dobra mera zloće va čoviku. A čovik bi moral imit navar sve ono ča ne valja i duron to zatirat da se nikad više ne torna. Ali vrag se vara!
Neće tako bit sve dokli va čoviku vrće onaj nesrićni črvić ki ga tira da bada i tamo kadi mu ni potriba badat. A ča se tudi more, kada su i Eva i Adam odavna već pojli onu jabuku ku nisu smili, ne poist, nego njanci zubiman zagrist.
Očevi librići
Potle očeve smrti već je i više od deset godin pasalo. Ali jednoga dana kada san spravljal njigove stvari naletil san na njigovi librići, ki su za mene danas i njigovi mali dnevnici od života.
Ti librići zapravo su katolički godišnji kalendari ki se zovu Danica, a uz svaki misec imili su nutrii jednu praznu stranicu za pisat bilješke. Ja i dan-danas pametin kako bi moj otac potle mise za Božić oli Novu godinu redovito donesal doma i taj librić Danica. Istešo, ma jednako tako pametin kako bi un znal, unako najviše zvečera, zet vruke olovku, nabandat na nos orćali i pisat va tu Danicu svoje bilješke. Dabome, više puti bi ja potle i zaviril nutra da vidin ča to otac unako destezo i redovito piše va taj librić. I nisan puno maril boj to bi najviše bili sinjali od svagdanjega posla: kada je i va koj njivi pokosil senu, kada je i po ki put indikal trsje, kada je ka ovca skotila, kada je koza popeljana kod prča i kada je i ona skotila, kada su posađeni kumpir, biži i bob i sve redon takova dogajanja. Niš važnoga, rekal bi ja sam sebi.
Ma jopet, potle puno pasanih godin kako da sve gre na drugi mod, na svoje. Tekar sada vidin kuliko vridi sve ono ča je otac tamo sinjal.
Recimo, va maju misecu 1998. godine zapisal je kako je na više mesti senu pokosil. Danas kada zračunan godine vidin da je te godine već imil punih 86 godin, pa se mislin kako more čovik od tuliko godin senu kosit.
A zonan velon koson ni lako mahat. Potle gledan da je još 1995. godine jušto na dan 16.12. zapisal i ovo: Tlak života, dana 16.12.- 160/80. Danas bi doktori rekli da je to veli tlak. Ma ako si ga zmiril va ono vrime, bil je jušto po meri. A sve se je brate prominilo, pa i to. I dobro je kada se sve mninja na mod da čoviku bude bolje, ali sve mi se pari da i ni vajk tako. Moj otac i mat nisu poznivali ni internet, ni kompjutor, ni mobitel. Ocu je zato vajk bilo važnije sinjat kada mu je skotila ona crna ovca od Kanta i kada je pal prvi snig na Velebitu, nego sve ove šordarije ča nas danas na svaki mod i muču i jadaju. Zato je i uz onaj veli tlak od života, koga je isto sinjival i imil navar, doživil pune 92 godine života.
Danas kada jedni drugiman spomenemo te godine, redovito se reče: Ča si munjen?! 92 godine? Kako ne, do unda odmene neće bit ni kosti ni mesa!
Kuuraju, bit će! Jedino morate ča prije kupit librić i ćapat se sinjivat.
Ben ma ne: kuliko su cene šle gori, kako su plaće male, oli ki je veći lupež na vlasti. Ne, nego jušto kako ono moj otac: kuliki mu je tlak od života, kada je počal pirule pit i kada je na proliće prvoga gada šerval.
Morete vi sinjivat i ono prvo, ali računjate unda da će vas puno prvije helikopter pokupit.
Piše: Josip Fafanđel (iz arhive Rapskog lista br. 33, srpanj 2016.)
