Iman prijatelja va Velomu Lišinju ki se zove Ive Kaštelan. A Kaštelan je zato boj i un potiče od Raba, oli još bližje od Brbata. Brbaćani će ga poznat boj su i njega i njigovoga pokojnoga oca zvali Sremac.
Piše: Joso Fafanđel
Reci samo Sremac, govori un meni, i svi će znat ki je to, oli ka je to fameja bila va Brbatu. I svaki put kada razgovramo priko telefuna, redovito još nadoda, da neka pozdravin svih na Rabu ki ga još poznaju. A vi skužajte ča o tomu prijatelju Ivu Kaštelanu – Sremcu pišen ovaj mali Kantunić, ma po moju, un je to sigurno zasvin zamerital.
OGLAS
OGLAS
Inšoma, prijatelji smo zato boj smo nas dva bili skupa va nidanjoj vojski i to celih celcatih godinu dan, tamo priko va sred grada Niša. Dabome, potle vojske smo se rastali, a un je završil va Velomu Lošinju kadi i dan-danas žive i ima velu fameju.
A nanovo smo se skupili na mod da je un moje ime čul na našemu radiju, pa je vreda nazval i ostavil svoju adresu neka mu se javin. A ča je najvažnije sve se je to dogodilo, a diboto 60 godin potlije, kada smo oba već ćapali lipe godine pa jedva da moremo jedan drugoga i prepoznat. Ali čujemo se sada svake šetemane.
Ben, ma otil san reć kako ga va ovoj ćakuli spominjen i zato ča un i dan-danas puno pameti onoga od starine, ča je sve i sam doživil kako mladić na Rabu, a najviše va Brbatu.
I užance starinske i zanimljivi ljudi, sulaci, sva moguća dogajanja, posal, ribarenje, pa sve do nidanjih onih ranih mladenaških ljubavi. A ja to z gušton sinjivan, ki put i na radiju spominjen, a evo, ovog puta ću i celi moj Kantunić tomu posvetit. Zapravo, povidat ću jednu njigovu ćakulu od toga nidanjega vrimena ku mi je jušto ovih dan un sam povidal.
Pita un mene, ove pasane šetemane pari mi se, ako ja poznan onoga Bimba va Brbatu.
Kako ne, poznan, govorin ja njemu. A poznaš more bit i njigovoga polubrata Željka Perana? – jopet će un. Poznan, dabome, govorin ja njemu. Ne samo da ga poznan nego smo pomalo i prijatelji. Sve me un to pita zato boj je čul da Željko piše i pismice po domaću. Ma ne samo to, govorin mu ja, nego je parićal i jedan veli libar od domaćih rapskih besed, a poradi toga je za Dan Grada Raba ovih dan dobil i velu nagradu ka se zove Nagrada za životno djelo.
Ma jesi ti vidil vranića Perana! – čudi se un. I kad je bil mali, vajk je nosil novine pod mišku. Kako to misliš? – pitan ga ja. A lipo, govori un meni, boj sićan se da ga je moj pokojni otac zval, ne Željko, nego Koncila, a to zato boj da je kada je bil mali nosil pod mišku mac onih crkvenih novin ke se zovu Glas Koncila.
Un bi ih potle mise nosil i dilil okolo po kućamin. Pametin kako ga je moj otac jedne nedilje vidil zotiman novinamin pod mišku, pa bi unda naglas rekal: Evo ga na, gre Koncila! A mi smo bili kući pa bimo ga pitali, da ki Koncila? Željko, mali Peranov, rekal bi un nato.
Ja san se, dabome, na to nasmijal, ali mi je bilo drago za čut kako su naši ljudi vajk imili duha za jedan drugomu kakov smišni nadimak kalumat. I dabome, evo mi sada potribe da dočim kuntran Željka moran ga i pitat je to istina oli ni. Pa ću ga more bit i ja od sada zvat ne Željko Peran, nego Željko Koncila.
Autor: Joso Fafanđel
