Foto: Michael van Eden - Play fighting
A reče se lipo brate da – kakov narod takova i vlast. Oli, da ljudi imaju vlast unakovu kakovu su i zaslužili. A naše vlasti, od dva briga kako se ono reče, odavna se već karaju i nećeju jedni drugih ni va oči popazit.
A naki mod se moru i popazit kad nećeju jedni blizu drugih, ne kuntrivaju se, nego se dricivaju. I da baren muču. Ne, nego malo-malo pa se medase badaju i šćiplju. Nati mod nan ni ovih dan nedaju mira. Malo je ča je vruće kako vrag pakleni nego nan oni još rigaju oganj kroz svoji zaici od zmaja i usta od maljika. Pa mi neka se medase karamo ki ima pravo, a ki ne, a naši vridni doktrori od prava i oni govoru jedni jedno, a drugi drugo. Kako da su pulitičri, a ne pravnici i peršone od struke.
Pametin, bilo je to još prije više godin kada su nas naši rapski tićari razveselili. Bili su vridni pa su Gradu va onaj nidanji Dom Partizan dopeljali svoji tići na izložbu. A tići kako tići, nisu bili namusureni nego su na svaki mod va gajbamin pivali i fićukali. A va toj kumpaniji od društva “Faganel” da je jedino niki Miljenko Maračić gojil, ne lugarini i grdelini nego samo one male papige, pa je i njih tamo prezental i dabome, na svaki modi ih je i falil. Tobože, ne samo da su papige lipe i šesne nego da su i pravi majstori za na svaki modi i blebetat. A jedan od njih da mu je unda rekala: “E šordo moj šordo, kada tvoje papige tako lipo znaju blebetat, a ča ih nisi kandidiral, a za baren jednoga našega presjednika.” I eto, tekar potle više godin vidimo da je zazbilja žbaljadu učinil.
Eto ga na, sada mi pade i jedna druga stvar napamet. Prije dosta vrimena naletih ja na jedan šalter, a nutri sedu dvi mlade ženske. Ja veselo unako po moju, tobože dobar dan, kako ste i sve tako na lipi mod, a one obe dvi glave potuljene i namusurene. I mislin se ja, ma ča je ovo, ki vrag je timan ženskamin, ča san in ja učinil? Ja vesel i pun lipih besed, a one namusurne, kako da nosin velu sikiru priko ramena. Oštija, a ja kad ih gledan unakove, jušto mislin da more bit one imaju sikire, svaka svoju šoto banka. Pa ako samo još jednu besedu rečen, latit će ju se one sikir, pa udri po meni. I ni bilo druge nego biži Bepo van dokli je navrime. I bižin ja na prešu doli skalinamin pa se jopet mislin da ki vrag je oviman ženskamin danas? Oli su se z mužiman celu noć karale, oli su se celu noć šnjiman po postilji tumbulale, pa su jadne na posal nedospane arivale. Ma daj Bože da je ovo drugo, boj unda bi ih čovik još mogal razumit, ali ako ni to nego ono prvo, unda mi pade napamet da bi i ja moglal drugi put, za svaku sigurnost, stavit i moju sikiricu zapas.
Da, jušto bi se mogla ona kamporska dogodit. Boj, nidanji pokojni Šimac da je čuval ovce po gušću, doli va Ogradah, a zapas da bi vajk med tarkiju i sikuricu zabol. A unda da je tako i maloga naučil, pa bi i mali stavil svoju sikiricu zapas. Ali kada je dite već malo naraslo govori un njemu: “Ala, lipi moj ala, budi dobar pa ćeš nedilju poć lipo z materon na misu.” A mali da je veselo skočil va zrak, pa da mu govori: “Ćaća, a oću zet sobon i sikiricu?!”
Joso Fafanđel - za Kantunić (10.7.2023.)
