Foto: Ivo Šubić i Hrvoje Hodak | Arhiva Rapskoga lista
Lako je po leti, reču nan, puno nas je, veselo je, movimo se i svi smo puni života, ma kako zimu preškrlate? A mi ljudi od školja rečemo in: A lipo, još i bolje! Gosti idu ća, a mi se pomalo vrnjujemo svaki svojoj navadi. Spravi se malo vina, poberu masline i učini ono šesno domaće ulje. Ako je lipo vrime odvežuju se kaići, prevari ka lignica i arbunić, a i par štokljići se na buri osuši. Ako vrime neda, ako se jugo riva, oli bura naliće, va teplomu se držimo. Svaki na svoj mod. Niki doma, niki va kumpaniji uz briškulu i trešetu, vrčić črnoga oli beloga i šempre uz puno krike, smiha i sulaca. Ma ki je rekal da ni lipo na otoku živit! I male stvari vazimat, a vele ćakule debandat.
Piše: Josip Fafanđel Arhiva Rapskog lista br.12 (siječanj 2010.)
Evo jušto jedna takova ka se je meni dogodila. Moji budući susedi, Vlado i žena mu Veronika, odavna se već parićivaju za novu kuću uzidat. Teren je pruntan, bageri su ga našestali, okolo je lipi zid uziđen i tako zemlja leži i čeka. A Veronika kako i svaka vridna ženska vreda je tamo i mali vrtlić parićala.
Pa malo paprike, malo pomidori, malo prtusimula, salate, par batvići jagod, malo merlina, a sve ga je, Bože moj, ona tamo nabandala. I gre je za rukan. Jušto sve jadreno raste i lipo rodi. Ali taj njezin vrtlić je nasami i uz gušćac pa su tići, miši, zeci i fazane na verduru navalili. A ja, ja uza taj njihov zidić svaki dan pasivan z auton i vajk unako napol kroz črnike šervan kada Veronika prška po vrtlu. I dabome, badnen sirenu i zasvirin pa je nati modi pozdravin kako to već i gre po krijanci. Ona unda digne glavu i mahne z rukan. Lipo po susedski.
Zač se to Veronika musuri?
Kad jednoga dana pasivan ja i vidin je kroz črniku va nikoj rozoj veštici i z belin facolon na glavi. Zasvirin ja, ali jok, ne javdlja se ona. Drugi dan evo ti nje jopet na istomu mestu. Ja nanovo zasvirin, ali jok brate, niti se diže nit z rukan zamaše. Treći dan jopet sve na isti mod. I sada se ja već pitan, tobože, ma koga vraga se je na mene naljutila? Četrti dan, nebudi len, ferman ja auto i gren vit ča je na stvari, zač se to Veronika musuri. Dignen ja glavu priko zida i znate ča san vidil? Ne Veroniku, nego – strašilo! Lula za beštije i tići strašit. Nasmijal san se i govorin sam sebi: Vražja Veronika, lipu mi je ploku zalecala! Ma ča mislite, ja se ne jedan nego tri dana strašilu klanjan i tri dana lula kako gospodina pozdravljan.
Da, ali znate vi ča se je potle dogodilo? Ni sve zlo za zlo. Zapuhala je malo jača bura, pasivan ja z auton, ali ni više Veronike, oću reć lula. Ferman auto i gren na zidić, pa san se z gušta jopet latil smijat. Bura je onoga vražjega lula pokloh obalila. Leži jadan potrbuške i muči. I tako san ja nanovo došal na svoje. Boj ja san varemante potle znal da je to strašilo, ali jopet, vajk kada pasan unako naglo z auton kroz črnike se vidi nika peršona i nikad nisi siguran je to Veronika oli lule. E da, a ni mi drago pasat, a da susedi ne zabibičen. Sada ga je bura obalila i ja više niman ča strahovat. A ni strašilo pozdravljat. Vražji lule, ma jušto kako da je general!
Užanca za sretan brak
Da, lipo je živit na školju. A ča nan fali? Sve nan je naruku. Trajekti su veli, Jablanac je blizu, a katamaran nas za tren oka popelja va Riku i nazad. I to svaki dan, a i za mali šoldi varamente. Spize imamo, doktori nas liču, a i helikopteri nan pomoru. Sve nan je naruku i ne čekamo i ne jadamo se va oniman dugiman filamin po šalteriman. Mir božji! Škole su pune dičine, a i mladih sve više na školju ostaje. I volu se i ženu tuta forca. Malo, malo pa na štantu priz niku kuću visi – lule. I ne samo jedan lule nego redovito šnjin visi i njigova divojka. Oba dva unako nešesno obučeni (ala lula), a muškomu sprida redovito visi, oli va zrak šćeto kruto jarbula, ona vela muška mrcina. Ča veća to bolja. Rugaju se vrazi nati mod oniman ki se ženu.
Ne znan otkud i od kad je ta užanca na Rabu, ma za moga vika vajk je bila i lipo je da se ni zatrla. Ne znan isto ako se to još kadi kolo nas dogaja. Pametin kako san odavna već bil na jednomu piru va Lošinju, a tamo se ženil mladić komu je ded bil Rabljanin i divojka ka je drito z Raba došla. I oni su poželili da se i tamo Lošinji priz kuću na štant obisi lule. Dabome, po propisu: z divojkon uzase i zonin svojin velin i krutin alaton pridase. A Lošinjani su se unda čudili da ča je to, kakovo je to čudo? A za onaj muški alat su njurgali kako je malo priko mere obilat. Ali to je tako. I tamo i na Rabu lule je vajk imil onu velu mrcinu mednoge. Noge moru bit i kraće, ali ona stvar med njiman vajk mora bit ako triba i duglja od nog. A bože moj, mladi su mladi i ni teško razumit ča in taj lule i njigov šestan alat poručuju. Sve za sretan brak, dabome. Ma jopet, za sretan brak mladi se moraju i na drugi modi slagat. Onaj kruti alat more bit ki put samo ješka. Oćo, ne more ni un vajk durat. I un, nažalost, jednoga dana žnjili i znemoća.
Štorija o laganeli
Da i more bit da su se jušto zato o tomu nesritnjaku vajk nike štorije povidale. Jednu takovu domaću mi je jedan Brbaćanin povidal. Va ono staro vrime tovar je va fameji bil veli težak. Sred vrućega leta niki Brbaćani, Ive i Marija, kopali su kumpir. Kroz podne je valjalo poć na ubed, naprtili su vrićicu na tovara, pomalo cu, cu i arivali su na dvor. Ive je dal tovaru naramak travine, sel je na prag od kuće i zafumal dok Marija spravi ubed. Hitila je ona na prešu niko mesinje na prsuru i latila se masariju prat. A tovar je potulil uši, grizal je travinu, sunce mu je ozgora križa zateplilo i bil je kuntenat. Unda je malo po malo kalal i otegnul onu svoju velu mrcinu šoto droba. A Ive je vreda šerval tu njigovu polugu, gledal je niko vrime, a unda je zazval ženu:
– Marija, ma dojdi malo van!
Molala je ona masariju, gre kuntra vrati van, tare ruke va krpu, a kada je arivala do praga pita ona Iva:
– Ma ča je Ive moj, ki vrag se je dogodil?
A Ive pokaže z rukan na tovara, pa je govori:
– Marija moja, ma pazi malo – ka laganela!
Ne znan je ga Marija poslala kvragu oli ni, ali govoru da se je Ivan najprvo dobro nasmijal, a potle malo i rastužil.
A kako i neće kad jedna ćakula, ovoga puta od Palita uvako govori. Pod stari dani ded i baba su se vajk samo karali. Ali ne samo karali, nego svako malo nisu jedan z drugin ni razgovarali. A mali nučić je to šerval pa govori dedu:
– Dede, ma ti i baba ste se i prije karali, ali ste vajk jedan z drugin i razgovarali.
A ded da ga je samo pogledal pa da mu unako na pol hijada govori:
– E lipi moj, umrl je onaj ki je mene i babu miril!!!
Eto ljudi, malo sulaca nikad ne škodi.
Živi bili, a lulov i laganel samo neka i naprvo bude. Neka. Neka njih!
Piše: Josip Fafanđel Arhiva Rapskog lista br.12 (siječanj 2010.)
