Foto: Hrvoje Hodak
Kuliko me pamet služi, vajk san govoril kako je šejsti misec najliplji misec va godini. A i bilo je tako. Ali za ovaj ovogodišnji ne moren reć da je bil na isti mod. A jok, ona druga polovica od miseca ni mi se baš jako pijažala, a računan da i vamin na isti mod.
Piše: Joso Fafanđel, za Kantunić, 4.7.2025.
Ne, boj za ove vrućine va štajunu od šejstoga miseca svi su govorili (a ne samo ja) da nisu normalne. A za čovika ki tobože da ni normalan, za njega se reče da je, a ni manje ni više, nego lud. Da, jušto tako su i ove vrućine, ma diboto i više nego lude, oli munjene. I niki in se ne more veselit, pa bi diboto rekal da ni gosti, boj i oni imaju telo i kožu kako i mi, pa jednako to ne moru potrpit. Ala, šu oni se jedino imaju prliku namestit kadikog uz more, pa se unda više va moru i banjat nego na kraju stat, pod kakov bor, oli samo pod onu velu lumbrelu, oli suncobranić.
Črški mi daju volju
Nati mod bi diboto rekal da se od svih ovoj vrućini veselu jedino naši črški. Varamente i to san već više puti spomenul, ali ako je ki od vas imil navar, moglo se je šervat, oli čut, da čakod je dan tepliji to oni još jače i bolje pivaju. A meni je to drago za čut, volin ih z gušton poslušat i kako da mi unda daju i volju zotin njihovin kurajen, da zaburavin na teplinju, pa rečen: a neka je teplo, ako niš drugo – neka baren črški uživaju. Da, ali moj je kaštig da bi ja ovo tude tribal pripovidat o još čemu drugomu, a ne samo o črškiman, tićiman, a i gadiman ki isto volu teplinju. Ali najradije bi o tomu i govoril, boj sve ovo drugo zvan toga sve više trači na ludnicu.
Teplinja i priko 40 gradi
Ben, ma još bi tribalo bit vrimena za govorit o vrućini, boj evo, sad smo zakoračili va sedmi misec, a to je tekar pravi misec od leta. Vajk je jušto sedmi misec bil najtepliji va godini, a va osmomu (kolo Vele gospe) sve pomalo popušćuje. Ali ako je šejsti misec bil unako tepal, ma ne tepal nego šćeto vruć, a kakov bi unda tribal bit ovaj sedmi. Ča teplinja od arije more bit i veća od 37, oli 38 gradi, pa unda ćapivat i teplinju i priko 40 gradi? Oštija, bojin se da to unda nebi bilo ni črškiman za potrpit. Na 40 gradi i oni bi lako mogli iskat kite na stablu ke nisu na suncu nego va debelomu hladu. E zato je njiman i težje nego namin. Mi se moremo tumbat more, a i doma pod tuš, oli van pa se z gumon od vode polivat. Pa unda sest na katridu va debeli hlad, oli se zaleć. A črški se ne moru ni kupat, a ni brez besede ležat, oni na vrućini još moraju i pivat. I to se jako nadimat. A i ja tako, ne moran pivat, ali evo moran baren ča to zapisat.
I pomidori njunjaju
Inšoma, ča se tiče vrućine, pari mi se da san sve rekal. A more bit da i nisan, boj ki bi vrag mogal o bilo čemu baš sve reć. Nisan recimo sve rekal o pomidoriman. A moran, boj i oni mi se žalu kada ih gren, a baren malo z vodan zalit. A zato ih i zalivan boj se žalu. Ala šu, pokril san ih zonan mrižicon, pa računan da in sunce sada manje pači, ali oni kako da i naprvo njunjaju. Da baren moru govorit pa bi mo se vreda sporazmili. Uvako vidin da ih još niki vrag žuli, a ne umu reć ča. Ali zato čovik i uvako z vrućin možjaniman još sve to more razumit.
Da, a njunjaju brate zato boj ono malo vode ča in svake večeri zlijen na koreni, bit će da in ni dosta. A četire kante vode na četiri redića, pa račun da je dosta. Ali oni ne govoru da je oli ni, ali zato pokažuju ča je na stvari. A baren ja tako mislin. Ča se dogdaja? Unako ozgora vidin va lišću lipi črljeni pomidor, pa ga zgušta zemen va ruku i već mljašćen kakao će bit dobar za salatu. Kad ono, pomidor je ozgora celi i zrel, a šoto ona druga polovica je zasvin gnjila. I mislin se ja, e to je ono ča mi pomidor govori. A govori da su mu one četire kante vode malo, pa da bi tribalo, a baren još tuliko. I ponesen ja taj moj bolesni pomidor kod suseda i pokažen mu ga, a un se je vreda latil ljuto smijat, pa mi govori:
– Ala vidi malo oni moji pomidori tamo va onoj kašetici na zidiću. Propijo su svi isti kako i ovaj tvoj. Smijen se, a ni mi do smiha, ali kada vidin ovaj tvoj pomidor, unda kako da mi je malo laglje, boj nesrića od njihove korone ni samo moji ćapala. Ha, ha i tvoji su va jako veloj gripi.
Još da je čoviku bit Čovik
Intanto, vidite i sami ča se dogaja. Poboljuju ne samo ljudi nego i pomidori. Ma ala šu, lako za verduru, ona će već pomalo arivat na svoje. Ali meni se na žalost čini, kako ljudi poboljuju, ma ne od onih redovitih bolešćin, boj za njih još vajk i ča to likarije ima. Ako te glava zaboli popiješ jednu pirulu i pasa. Ali za one druge bolešćine va glavi kako daje sve manje lika.
Gledan ča se po svitu dogaja, kuliko ljudi i dice gine pod bumbamin onih bolesnih kih bi. a baren va bolnicu Kampor tribalo ča prije dopeljat. Pa da neću više volit gnjili pomidor oli črška nego čovika. Na ovoj vrućini črčak nikoga ne bumbardira. I ne jada se nego duron samo veselo piva i piva.
Piše: Joso Fafanđel, za Kantunić, 4.7.2025.
