Greš nutra, samo ča ti vrata ne otvoru…

Uz ovih nekoliko fotografija iz povijesti ugostiteljstva na našem otoku donosimo vam i živopisan fragment iz čakavske kolumne “A more i navi mod” autora Josipa Fafanđela objavljene u Rapskom listu br. 19 (studeni 2012.) povodom obilježavanja jubileja 50 godina Ugostiteljske škole na Rabu. (H.H.)

…Toga godišća, l962. (ko je već odavno nažalost) i ja san bil već va srednjoj školi. Ali, ne va ovoj nego priko mora, na kraju. Završil san školu i arival san doma na Rab, pa san šal va vojsku i nanovo doma arival. I zaposlil san se kako mladi službenik. Veštit, kravata, sve kako triba, jušto po modi od onoga vrimena. A moda je tih šrdesetih bila, a i potle, da se, kolo desete ure, gre i na marendu. Ma ne migo, po sendvić, salaminu, oli nedaj Bože današnji hamburger. Ne, nego na pravu i stabelu marendu. I vreda su me avizali: Ako ćeš na pravu marendu, unda hodi va Sloveniju.

Dabome, a ta Slovenija je bila učeniški praktikum kako se to po mudernu reče, jušto te, va ono vrime još mlade Ugostiteljske škole. I šal san ja tamo i neka znate da ni za dlaku nisan pogrešil. Ne, nisan žbaljal. Greš nutra, samo ča ti vrata ne otvoru. Na recepciji blaženi dobar dan od mlade divojke, a va sali jopet pozdrav, pa vreda skaču, sučuju ti mantil, oli nidanji šuškavac, spravljaju lumbrelu i peljaju te drito sve do stola.

Potegne se katrida, naklon i izvolite. A unda mi je jedna mlada divojka donesla kartu od menija. Digal san glavu i pogledal san je za reć: fala. Ali toga momenta šerval san najliplje oči ča san ih do unda vidil na ovomu svitu. Jušto kako i naše more: vele i modre oči od lipe divojke. Malo san se stresal i naručil naravni odrezak. I jopet nisan žbaljal. I vajk san govoril, a i dan danas ću reć, kako je to bil najbolji naravni koga san va životu kušal. Pa drugi dan pljeskavica, jopet gušna ka svi gušti ovoga svita. Ali, ovoga puta bez ona dva modra oka. Pa treći dan jopet naravni, ali evo i nje, jopet ona z modrima očima.
Da, bile su to i posluga i spiza, ke se nikad va životu ne moru zaburavit. Bila je to škola ka je davala one konobare baletane ki su se kolo stovlov oholo i žveljto okritali zonan velon i teškon drvenon tacnon zgor glave.

Bila je to škola ka je gojila srce ovoga našega ugostiteljstva i jako se nadan da je evo i dan-danas tako. A onu nigdanju, danas nažalost pokojnu Sloveniju, puno od njih neće nikad zaboravit. Nastavnici i školanti pametit će je po svemu onomu ča su tamo lipoga doživili, a ja eto, ja neću nikad zaburavit onu najbolju poslugu na svitu, onaj gušni naravni i dabome, one vele i modre oči od lipe divojke.

Autor: Josip Fafanđel (arhiva RL br. 19. - studeni 2012.)