Foto: Josip Fafanđel
Ma jušto prije dvi oli tri šetemane dajen ja mojiman kokošamin, unako prid večer, malo žita. Ma i petesima, dabome, boj ki je vidil imit kokoše, a ne imit medanji i peteha. Varamente, meni se poradi toga i rugaju. A znate zač? Zato boj ja iman deset kokoš, ali i deset petehov.
Deset na deset
Da, svaki neka ima svoju, a ne da se po tujiman prtu. Volu oni to, kako i mi ljudi varamente, ali ja san tako odredil. Beštija neka ima svaka svoju, a mi muški činimo jopet brate po svoju. Od kad je svita vajk je tako bilo i ja to ne moren prominit.
Ali ostavimo se mi tih ćakul i tornajmo se kokošamin. Kako ča san već rekal, dajen ja njiman malo žita pa mi pade napamet da će za par dan i Vazan arivat. I vreda san in zato dal komandu: Od danas oću da mi svaka od vas dnevno po jedno jaje znese! Petesi su to čuli pa su digli glave, a jedan je odmah na svoju kokoš skočil. A bit će da je razumil kako ja oću jaja za njigovu dragu nasadit, boj to pari da bi potle mogal i masu dičine imit. Ben, ma kako mu reć da meni ne tribaju jaja za košku nasest nego mi tribaju za skuhat ih za Vazan. Anke još i piturat. Ali koga vraga ću ja to petesima govorit, neka oni samo po njiman jašu, to meni njanci malo ne smeta. Ma ne da mi ne smeta, nego mi je još drago i za vit. Pa još kada se dogaja ono, tobože, pren pa jopet.
Loža na slobodi
I tako ja mučin, kad drugi dan šervan ja šoto jednoga grma kokošje lože i va njemu ne jedno nego šejst jaj. E mato moj mato, govorin ja sam sebi, ti kokošamin daješ komandu da nesu boj da je brzo Vazan, a one su se već odvana latile toga posla. Zato su ono petesi digli glave i pazili va mene. Dabome, i oni su se čudili da ča ja to govorin. Ma vražje kokoše, a ki je njiman dal kalendar, pa da one znaju kada je nedilja od Vazma? I ni mi bilo druge nego obać i drugo grmlje pa nać sva njihvova loža.
Da, boj moje kokoše živu na slobodi. Nisu va garmi, niti va garmu oćeju poć, nego živu okolo po derinamin, a spu gori po stabliman. I kad je lipa noć i kad daži, pa su zato vajk čiste i šesno uređene. A zdravo blago, pa su zato i zdrava jaja, računan ja. I lipa bela, a ne kako ona od butige ka su žuta i kafena kako da ih kokoš već va sebi pitura. A ova moja šesna i bela kako da mi je žal i piturivat. Ma šćeto ih je lipo i vit unako našestana va malo škurijoj terini.
Nima samo kokoš jaja
Inšoma, vidite i sami kako malo triba čoviku da ga i jaja razveselu. Kokošja, dabome, boj valja priznat da nima samo kokoš jaja. A ne, boj jaja moru bit i od tića, da ne rečen da jaja imaju i brav, vol, bik, a prč da se ne govori. A kako zaburavit tovara, boj i tovar ima jaja. Ma, ala šu, ako ćemo pravo, tovarja jaja se malo spominju. Ako se jaja spominju unda su to više ona od brava oli prča, boj su ona malo obilatija, a da ne rečen kako ljudi imaju nauk da ih ki put spravu i za ubrok. Ja, varamente ne, ja ih nikad nisan volil. Volin ih gledat na beštiji, ali spravit ih va prsuri, e to ne.
Oštija, a ne mojmo zaburavit da i čovik ima jaja, ali ona se jako na retko spominju, dabome, najviše poradi srama, boj da je grubo za čut.
Ma, ala šu, isto se ono zna reć kada je čovik ljut da će toga i toga ćapat za jaja. Ne pačan se poradi čega se tako i jaja od tovara ne spominu, ali bit će zato, boj kod tovara se ben više spominje ono uz jaja, ča se ki put kaliva na doli, pa unda i jako grubo naraste. I tako van je brav znan po svojiman jajiman, a tovar po onoj drugoj stvari šoto droba ča više trači na domaću laganelu.
Golubica
Eto ti ga na, rič po rič, pa se od jaj more i cela štorija povidat. Ali ovoga puta hitit ćemo oko više na kokošja, na ona Vazmena jaja, kako ona piturana na tavli va terini, tako i ona pečena va onoj starinskoj pletenoj pogačici ku smo od vajk zvali – golubica. Matere bi ih sakomu ditetu po jednu spekle i još bi ih crikvi blagoslovile. E lipa moja žuta golubica, ma jušto mi je kako ditetu va velomu spominu ostala. A ono njezino zapleteno jaje na vrhu, bilo je najslaje od svih onih drugih vazmenih, bila ona piturana oli ne.
Altroke ona od brava! Fuj!
Piše: Joso Fafanđel, za Kantunić, 28.3.2024.
