Foto: Petar Beg (arhiva RL-a)
E uvako: sada ću ja lipo, a diboto i unako kuražno reć – gotovo je, ode zima! A kuražno da, ča se čudite, boj ovo ni drugi nego treći misec koga mi zovemo marač. A više puti san rekal i to da ga šempre zovemo, ne marač, nego ludi, munjeni i smamni misec. A sve je ćaro i zač.
Iman kuraja reć da je zima na kanati i zato, boj da se sve već zeleni, cveta oli pupi pokažuje. A blizu je i Uskrs, oli Vazan. To pari da je pasala i peta korizmena šetemana, tobože od one prve potle mesopusta. A govorilo se je da se va korizmi ne smimo priko mire ni veselit. Tobože, veseli bit da, ali ne priko mere tancat i ludovat. Inšoma, a ča triba i reć! Pa po tomu smo mi Rabljani prvi katolici na ovomu svitu. I veći od Pape.
Oštija, a nismo se za vrime maškarov baš jako natancali, a potle još i manje, ako manje od niš i more bit. Poštivali smo korizmu, nismo hodili okolo i ludovali, a ni kumparali se priko mere, nego smo lipo stali doma, zatvarali se va kuće, virili va televiziju i strahovali da nan kakova serija ne pasa, a da je mi ne vidimo. Ma, ala šu, ne baš svi, nego kako ki, dabome!
Ali kako ča san rekal zima gre pomalo ća. Škoda je jedino da je uvakova mokrinja po vanu, boj jedni bi se ćapali zemlje, uredit vrtli i posadit kumpir, oli ča već ki sadi, oli sije. Drugi bi jopet uz lipo vrime šli i ku šparugu nabrat. Teplo je pa su i one ove godine malo naprešnije. A zadnji dan ovoga je i Uskrs, oli Vazan po našu. Sve nan to i kokoše navišćuju, boj z dana va dan, sve se više najde domaćih jaj na ložu. A ki je i vidil vazan bez pituranih jaj na tavli.
Ali, po kalendaru prvi dan prolića da je tekar sredu dvajseti ovoga. Magari su namin va školi duron govorili da je prvi dan prolića ne 20., nego 21. marča. Pa bi nas toga dana i va prirodu peljali. Kad, po novomu ne, nego da se proliće začimlje 20. marča. To da se po astronomski zove prolićni ekvinocij, oli po hrvaški bi rekli ravnodnevica, boj toga dana da su noć i dan jednaki. Ja se va to ne pačan, ali su me isto malo naljutili, oli bolje reć ražalostili. A znate zač? A zato boj govoru da mi više za našega života nećemo doživit da se proliće začme 21. marča. Ne, boj da se po astronomiji očekuje da će se proliće nanovo začat 21. marča tekar 2101. godine. Da, da- 2101.! O, kako bi bilo lipo i to dočekat. Ali na žalost nećemo, nego moramo bit sretni ako doživimo i ovu sredu kada se proliće začimlje na dan 20. marča.
Palac gori i za proliće i za leto!
Proliće vridi doživit, boj ono nan nosi novo rođenje i lipotu prirode, a mi moramo bit oni ki će učint sve da to i kroz nas pasiva. A oni ki to ne razumu, a neka se baren veselu da potle prolića i leto gre. A za leto se zna ča nan ude na Rabu nosi. Nosi puno posla, ali i puno gosti, pa sve to zajedno unda pomalo i naši takujini napunja i debeli. I zato palac gori i za proliće i za leto! A i za nas, dabome. Ala šu, kvragu neka gre, ma i za takujini.
Ben, ma ja ću danas malo preskočit leto pa ću se prehitit va jedan zimski štajun kada san sedil gradu va jednomu kafiću, jušto unako priz ono velo staklo. Imil san pridase novine i niko piće, a nutri smo bili samo ja i još jedan naš čovik (kuhar), nažalost danas već pokojni. Ali da van rečen naki mod san se ja domislil ove štorije. Domislil san se kad san šerval da su ovih dan na Rabu potpisali niki ugovor, tobože, za onaj veli posal ča će ju ga čint va Suhoj Punti. To je onaj posal koga su naši od opozicije va Graskomu vijeću jako napadali, boj da je to građevina ka šundriva našu lipu Suhu Puntu. Ali za badava sve to, ugovor je potpisan i posli će poć naprvo, a to pari da se dogaja ona starinska – da pasi laju, a kolone pasivaju! A to jopet pari da su pasi najviše na debelomu vezu, oli na kadinamin.
Va onomu našemu Imperijalu…
A Suha Punta je vajk bila velo, lipo i muderno turističko naselje. I puno je ljudi tamo lauralo i svoje su fameje hranili. E, ali ča ova moja mala štorija govori? Kako ča san rekal, sedimo va kafiću ja i onaj kuhar blizu mene, ljudi po ulici pasivaju, a un se najedan put naglas javi:
– A pazi malo onoga! Učinil je kuću na tuji račun pa sada špancira.
Ja mučin, čitan tobože novine, ali un se jopet javi:
– A pazi onoga, malo se je nakral po Suhoj Punti!
Ja ne obadivan, jopet se činin da čitan novine, ali un duron viri van kroz staklo, pa se jopet javi:
– A pazi njih dva! Malo su se tamo nažerali na tuji račun!
Ja malo dignen galvu, va masi nikoga ne vidin, a ne hidan se njega ni pitat da ki su to. Puno toga i sam znan, pa je bolje mučat i imit svoga mira. Ali onaj črv va meni me isto malo bada, pa se sve va sebi mislin: A bože moj, dobro su nan ona poduzeća va ono vrime i durala, ako su tako svi samo lupežarili i zidali kuće na tuji račun. Oštija, to pari da je onaj naš stari Imperijal bil jako šalad. Tribalo je sve to i podnest. Svi vazimlju i još ima za svih. I po leti, a i po zimi za plaće dobivat. I sve tako ja va sebi študijan kad onaj uzame jopet se javi:
– A pazi malo onu tamo! Malo ih je na sebe primila!
A nato unda i ja dignen glavu, nisan više mogal mučat, pa mu govorin:
– Bogara mi moga, a lipo ste vi unda živili va onomu našemu Imperijalu!
– Malo, malo su se pojedini nagrabili! – govori un nato meni.
– E, a čujen, govoriš da ste i ženskamin baratali? – pitan ja njega.
– Minjeno!!! – skoči un kako oparen. E da postilje i ono pusto grmlje okolo znaju govorit!
Piše: Josip Fafanđel - za Kantunić, 18.3.2024.
