Foto: OPG Kanat (Barbat)
Da, i va ovoj ćakuli od Kantunićev isto moran učint kanatu za ovu godinu. Ki bude čital va ovoj godini – finito, gotovo je! A ki bude va onoj drugoj unda smo tekar na začetku. Kako je da je triba se pomalo sforcat, oli bolje reć vazimat forcu, za još jednu godinu od začetka zdurat.
I daj Bože, kako se ono reče, da je zduramo, a sve se to more samo neka nas zdravlje ne mola, a zausput i bokun sriće dopade, pa će sve bit kako triba.
Varamente, uvik smo stariji za jednu godinu, ali neka i na to smo naučili, ni ovo prvi put da smo još jednu godinu naslagali na sedla od našega života. I zato čuvajmo ta sedla i zaželimo jedni drugiman da nan i dogodine budu tribala. I nemojte pitat da koga vraga će nan sedla kada nimamo tovara. Sedla valja spravit i čuvat ih, a tovari, dabome, tovari ćemo morat bit mi sami. I ne za prvi put!
E ali i nas će, kako i tovarov, bit sve manje, ako nan se ne popravi ono ča govori ona gruba rič – demografija. I na Rabu, dabome. Zato ću povidat jednu lipu štoriju o našemu lulu i lulici. A da zausput rečen kako naš već spmenuti tovar i naš lule imaju jednako dobar alat, ono šoto mednoge. Pa kada na štantu vidin da visi lule, unda se vreda domislin i našega blaženoga tovara.
Kako na prešu popravit demografiju?
Ma na žalost, tovara se danas sve manje more kuntrat, ali lula na sriću da. A to mene isto veseli i to poradi dvi stvari. Prvo, jako je lipo da naši mladi nastavljaju tradiciju, užancu da se i danas ima nauk, kada se ki ženi, načint lula i stavit ga gori na štanti priz njihove kuće. A uz lula, načini se i lulica, boj koga vraga će lulu šoto ona njigova vela laganela, ako uza njega ni i ona šesna i mlada lulica. I drugo, poradi čega me to veseli, to je i sinjal da se mladi sve više ženu. A ako se ženu, unda će bit i dičine, pa eto nan i lika za današnju slabu demografiju na prešu popravit.
A lula danas spominjen i zato boj san ih i ovih dan vidil, ne jednoga nego tri za redon. I to samo od Drage do Lopara. I rekal san da bravo, neka se mladi ženu i neka samo luli visu gori po štantiman. Pa se unda neće dogajat kako ove godine, recimo va Drazi, da ni bilo njanci jednoga prvarića za va školu se zapisat.
Ma zazbilja se čudnovate stvari dogajaju. Da ne rečen, kako pametin, kada san ja bil mali da smo mi prvarići jedva stali va jedan razred. A ni to zato boj da je unda bilo više force ala tovara i lula, nego su mladi manje hodili po tanciman, a više su se po tepliman postiljamin takali, za ne reć i kuntra mocire stiskali.
Inšoma, ali ni dosta navijat da nas više ima, nego je jednako važno zaželit da budemo i bolji ljudi na ovomu svitu. Zato je meni, uvako za kanatu od ovogodišnjih ćakul od moga Kantunića, pala napamet i ona znana rič inventura! Na kanati od godine svi je činu. Da, triba učint računi da se vidi na ki mod je godina pasala, je nan oli ni bila od koristi.
Recimo, kuliko smo od gosti zaradili. Na mod da svi stroški pobrojimo i to stavimo kuntra onomu ča smo od gosti pobrali. Dabome, ča va tomu računu ostane to je naša zarada, oli po mudernu- naša dobit.
Ali kako vraga ne! – sve se bojin da ni puno od nas nati mod računalo. Svi se više držimo one starinske navade, tobože, rivaj šoldi va bičvu, pa kad triba trošit guli pomalo z bičve van. Pa ako va bičvi ostane puno unda se veselo za bradu lovimao, ali ako ostane samo mali klupčić na dnu od bičve, e unda udri po vlastima. I oniman va državi i ovima našiman na Rabu, boj da su vrazi pakleni sve pokupili s poreziman i komunalijamin.
Ali ne pasa ni misec dan, a na dvoru se trefi još jedan novi i lipi autić, pa to unda pari, da se je nika žbaljada dogodila i da bi inventuru tribalo nanovo učint. Oli zgulit van i onu drugu bičvu šoto madraca ka kroz inventuru ni pasala.
Inventura od samoga sebe
I još samo ovo. Jedan put mi je jedan mladi čovik rekal uvako:
– “Ma znate ča ću ja vamin reć! Čovik bi moral svake godine učint inventuru i samoga sebe!” Ja san ga pogledal, pa san mu rekal: “A znaš lipi moj, da ti imaš pravo!” Rekal san to zato, boj zazbilja ni dosta samo brojit šoldi, nabrajat stroški, postole, vino, ulje i rakiju, nego bi istešo ki put tribalo učin i inventuru samoga sebe. Da, pruntat malo na tavlu i sebe kako čovika. Tobože, ča san to dobroga ove godine učinil, jesam ča more bit i žbaljal, oli nedaj Bože, drugomu i škodu učinil! A za inventuru od vina, šoldi i rakije ćemo lako, ta invenutra ni teška i nikomu ne pači.
Recimo, malu inventuru bimo mogli učint već i jutro na dan od Nove godine. Tobože, kuliko smo noć prije popili vina i kuliko koga glavina boli i otiplje. Ala onih Kamporcov ki su jedanput slavili Martinje, tamo kod Iva Staničića, pa kada je tribalo niko doba noći se doma rasteć, da je bilo i onih ki su va potoku prespali. Potle se je povidalo da su oni po noći kršćevali vino, a drugi dan nazoru, da su unda žene – ben i njih kršćevale.
Inšoma, ki ima volju neka se vreda lati čint i tu vražju inventuru od samoga sebe. Pomoć će nan to da budemo bolji, kuražniji i veseliji i va novoj 2024. godini. Ala šu, pa neka tako i bude! I sritno van bilo!
Joso Fafanđel za Kantunić, 29.12.2023
