Foto: Foto: Miroslav Maroević (iz arhivske zbirke Josipa Andrića)
Inšoma, govori se da je Valentinovo dan od ljubavi. Niki dan, a potle više od dvajset godišć, otvoril san ja jednu starinsku škrinju va koj na šufitu (granaru) čuvan nidanju starinsku robu još od moje pokojne babe, a jedan del i od matere. Med tan robon našal san i jedan stari kapot od moga pokojnoga oca, a va taški od toga kapota napipal san i jednu zgibljenu karticu. Otvoril san je, a va njoj z rukan i običnon olovkon napisana je jedna pismica, od celih celcatih 59 kitic. Pismica je ljubavna dabome, a zove se “Kako je teško dragu ostaviti”. Evo ga, rekal san sam sebi, evo malo starinske ljubavi, jušto za Valentinovo.
Sve naše starinske pisme najviše i povidaju o nesrićnoj ljubavi i žalosti kada su nidanji mladići morali hodit najpvo va onaj prvi, pa unda i drugi rat. Na taj mod napisana je i ona pismica ku san našal va taški od kapota. Va njoj se spominju dva imena: Osip, koga diovjka od mila zove Joško i Ante ki se z rata nikad doma ni tornal. Poradi sinjala na starinski mod Valentinova, evo prebral san samo par kitic od te novo nađene pismice:
“Mala moja moje milo janje/ Evo dojde naše rastajanje / Jer ja moram sada odlaziti/ Tebe dušo mladu ostaviti. / Sićat ću se onog lipog dana / Kad si bila va kužini sama / Kroz prozor si ručicon mahala / I kod sebe mene dozivala. / Mala moja moj rumeni cvijete/ Ti kod mene više doći nećeš/ Teško mi je takve riči čuti / Došlo mi je da ću se ubiti. / Dušo moja sjećat ću se tebe / Kad mi srce na čuki prezebe / I još kad se sjetim onog dana / Kad si bila va kužini sama/”
I ča potle ovoga još reć? Mladi se danas volu na drugi mod kumpanjat, uz dari, pivade, tanci i vičere. Ali korona je evo i to zamutila, pa se bojin da od pivad neće bit niš, ma mladi ćeju već učint svoje na niki treći mod, a za oni malo stariji ja san eto i jednu starinsku “otpival”. Lipo je i jedno i drugo. Ono muderno zato ča svit gre naprvo, a ono starinsko jopet zato ča je ljubav bila vajk ono ča će za vajk i ostat. I ni triba puno govorit, dosta je samo reć tu jednu jedinu rič – ljubav!
Za ovu prliku domislil san se i jedne pismice ku je odavna već napisala Zdenka Krišković. Ljubavna dabome, ali na svoj mod, pa ću van zato na kraju reć kako se zove.
Rasula san kose
u meke dodire tvoje
sad te ljubim, a onda grebem
pa opet
u tvoje mirise se unesem
cijelivam te noću
misli svoje dajem
snove dozivam
i suzu prolivam
grlim te snažno
kao da je posljednji put
a onda te odguram
negdje u kut
a tad opet – jako te želim
tražim te i vučem
grlim te u svoje skute
mirišem te – i jako te volim
a jutrom kad sunce grane
bacam te na krevet
negdje – sa strane.
Virovali oli ne Zdenka ni pismu napisala ni mužu, ni mladiću, već kušinu pa se pisma tako i zove – Kušin. Ben, ma nemojte se niš tomu čudit, kušin je to zasvin i zamerital. A kadi više i je ljubavi palo – nego jušto na kušinu.E pa – sretno vam Valentinovo!
Napisal: Joso Fafanđel – Za Rab Danas, 14.2.2022.
