Foto: RabDanas
Ali slabo je to veselje za dani od mesopusta ako se čovik malo i ne zamaškara. A kuliko san ja mogal šervat, Rabljani su odavna već zanemarili svoji maškari. Ala šu, ne baš svi, ali oću reć da se ljudi malo va zadnje vrime maškaraju. Oli mislu da ih niki drugi maškara, pa da unda ni potriba maškaretu ni kupovat. Sve more bit – i toga ima!
Inšoma, vrime kuri a i maškari su ove godine prvije, pa ćemo vit ča će bit.
A vit ćemo ča će bit i cele ove nove godine, boj ni dosta veselit se i mašakrat, tribat će se latit posla i ča to i laurat. Kako mi doma, tako i naša poduzeća i vlasti.
Čitan tako ovih dan, da će ovi novi gazde od našega Imperijala, jušto hotel Imperijal do sezone parićat na mod da va njega više nećeju moć doć oni ki sobon peljaju dičinu. To da je niš novoga i mudernoga va turizmu, makar meni ni njanci malo ćaro ča bi to moglo bit. A i zač dica nesmu va hotel, a pugotovo da se nesmu kupat skupa z starijiman vani va onomu bazenu. Oštija, ča se mene tiče, dabome, ja bi više volil da se uzame va bazenu pocura malo dite, nego kakov stari droban čigova pišota smrdi ala vraga paklenoga.
A da će namin Rabljaniman va ovoj godini bit bolje pokažuje tobože i to da naš gradonačelnik nima samo vele škole, nego je majstor i za takat one balice od stakla. Na Pjaceti, da je osvojil prvo mesto ove godine va onoj strarinskoj igri na fronje. Ala, ala, govori mi nato jedan, lako je takat. Svi ki su na vlasti i jesu najveći majstori jušto za valjat i takat. Ni straha, taču navelo!
Bit će bolje – sretna nova godina!
