Foto: Ilustracija: Hrvoje Hodak
Ove godine da se je takmičilo devet kumpanij, a dobili su komandu ki će učint bolji brudit i puletnu. I evo ti ga na, uteče ovoga puta nagrada drito va Lopar. Da, Adrijano i Nenad Ivče da su bili najbolji. To pari da se tamo kolo Gologa i Grgura još more agvantat par komadi dobre ribe. A brudit i je nagušniji ako se više vrsti ribe vanjega zamiša.
Kad Kamporac Kamporcu začrni brunčić
Da, sezona je pasala, pasala je i Kanata, ali za vajk je ostala jedna starinska štorija od brunčića. Niki Kamporci da su šli doli Kalefrant s celoga dana sić drva, a uz more, na žalu, namestili su brunčić va koga su stavili kuhat dobar komad četrti od ovčine. A sobon su zeli i jendoga maloga diška koga su svako tuliko slali doli na žal da potakne oganj i ima navar ako meso kuha.
Ali ča ćeš vraže, istoga jutra je bil na bonaci s patanon i ostićiman niki drugi Kamporac. I šerval je un na žaliću brunčić, a nideri nikoga, pa je digal pokrovčić i vidi un nutri onaj lipi komad ovčine jušto već kuhan. Nabol je na prešu taj komad mesa na zbicu i zel ga je sobon va patanu, a nutra va brunčić hitil je jednu velu sipu ka je vreda va brunčiću svoje mrčilo pustila. I samo ča je zamakal za punton od vale, evo ti mali teče na žal obać brunčić i oganj. Digal je pokorvčić i vidi un nutri črnilo, od koga viru van dva tračića:
– Ćaća, zove mali oca, a je vrag črn?
– Je sine je, govori mu otac, nego ča je nego črn.
– Ćaća, jopet će mali ocu, a ima vrag rozi?
– Ima sine ima, govori mu otac.
– Jo, ćaća moj dragi, govori nato mali – unda je vrag nutri va našemu brunčiću.
