Čovik s čovikon

Dvi riči i jedno slovo, ča ih vežuje:

Čovik s čovikon.

Oli, jedna rič, 

Ma na svoj mod zauzlana.

A mi, nedajmo da se ti uzli razvežuju

Nedajmo da nas kaljaju i truju

Nedajmo da nas češmaju

I kroz grdaše pasivaju

Ala kudilje pletu

Na vretenu okriću 

Oli, na muninelu predu.

 

Čovik ni preja

Da se more va klupko zamotat

Oli kroz grdaše pasivat.

Ne, čovik je čovik

Čovik s čovikon, se reče

I to neka budu 

I naše staze i puti moji 

Da se va klupko

Samo s ljudiman zaplićen

Da me niki ne režentiva

Češma, oli trljeca.

I da med ljudi i čovika vidin

 

Da,

Čovik s čovikon

To je ono ča me nosi, drži i pijaža.

Dvi riči:

Čovik s čovikon

Oli samo jedna

Ma, na lipi mod zauzlana.

 

_{Autor: Josip Fafanđel}