Foto: Miroslav Maroević (1900. – 1975.) - iz arivske zbirke Josipa Andrića
Inšoma, otil san reć, kako je puno od njih ovo lipo vrime skoristilo i za masline pobrat. Varamente, valja reć ča je, i ne baš puno od njih, boj zapravo se više njih žali da in masline ove godine nisu dobro rodile. Ali ovo malo ča je rodilo latili su se vreda po onomu lipomu vrimenu pobrat. Ma razumin ja da je po lipomu vrimenu gušt i masline brat, ali se vajk i tužin na današnji nauk da se masline beru zelene.
A to mi je jušto jedan ovih dan i rekal. Tobože, da neka oni beru, ali da kod njega va konobu nećeju poć zelene nego zrele balice od maslin. Ako je preša, poradi gruboga vrimena, da se more dogodit da mišano pobere i ku zelenu, ali dokli je vrime lipo, da neka one samo zriju.
Kuliko ja vidin, govori un meni, neće ni tići da idu zelenu, ne nego se zaliću na onu škuro čerljenu, ča oće reć zrelu. Eto i ja se zotin čovikon zasvin slažen. Ben, ma to kako da je postala i moda danas. Gledan i po televiziji, sve od Istre, pa doli do Dalmacije, svi su se redon latili brat zelene masline. Ala šu, ako vidin mišano i one zrele, tobože kolo pol i pol, onda se već zotin i ja slažen. Ali jušto san pasane nedilje gledal kako jedni beru ma propijo zelene. Da bi, a baren jedna medanji bila zrela! I još in tobože stručnjaci daju kuraja, boj da je od zelene masline ulje puno bolje nego od onih zrelih.
Ulje kako da se je zlato rastopilo!
Ala šu, ni se lipo ni stručnjacima zasvin kuntreštivat, boj i oni nikoga vraga znaju, ali ja se ki put volin držat i onoga strarinskoga nauka. I mi smo doma vajk brali zrele, a ne zelene masline. Domaća naša orkula, i zrela i vela, a ulje kako da se je zlato rastopilo! Ali kad smo ih brali, već su pomalo i prsti zebli. Bi rekal moj prijatelj Slavko, i ja se brate držin one starinske ka govori uvako – mrtvi dan- skale van!
E to je ono ča se tiče maslin, a o grozju najradije da nebi ni govoril. Boj ako i otvorin ćakulu o tomu, unda moran govorit o tujemu grozju, a ne o domaćemu, našemu rapskomu. A ki je vidil prvije ma i jednu kuću na selu, a da sve naokolo kuće, pa i dalje, ni bilo a baren par stotin loz. Ali malo san rekal, boj svaka kuća imila je po par hiljad, a ne par stotin loz. I to po celomu Rabu, sve od Brbata pa do Lopara.
Vrči, bocuni i žmulji
Ma gre mi za reć da je unda celi Rab dušil po domaćemu grozju, a ovo doba i po mastu, po kuhanju mladoga vina i po rakiji od domaćega lambika. Zato su to bile i naše užance, pa ni bilo kuće da na tavli ni duron bil pruntan onaj starinski vrč od vina. Onaj na komu bi pisalo: pij Ive, oli Pij Frane i sve tako redon.
Pametin, moj pokojni sused Pere Pekić, još bi nutra va vrč stavil i dvi-tri landice od lipe zrele naranže. Ma od one slatke naranže, ne migo od kisele kako ča su ove ča ih danas kupujemo. Zvana je lipa i žuta, ma prava lipotica za vit, a nutri kisela, kako da je uzrijal limun, a ne naranža. Mi kad smo bili mali nismo baš imili šempre naranže na tavli, ali kada bi ih ki put mat donesla od Grada, pametin da su lipo dušile i da su bile slatke, ma za prsti polizat. A ko dite bi ilo kiselu naranžu? Kako ne! Eto, takove dvi-tri landice od slatke naranže, kako ča san već rekal, stavil bi Pere Pekić va onaj svoj vrč vina, na komu je, dabome, pisalo – pij Pere!, a ča drugo. Lipo gusto i črno domaće vino!
Ma evo, ni mi druge nego moran reć i to, da kada san ja bil mladić, ti vrči od vina i imenima na sebi, nisu baš dugo durali. Pomalo je hodilo novije vrime, pa su se ljudi liberivali vrča i na tavlu bi se stavljali muderni stakleni žmulji. Vrime i moda su činli svoje. Muderno je bilo, kako ča san već rekal, imit doma stakleni žmulji, pa su se zotin pomalo domaćice i falile. I još bi se i bocuni i žmulji stavljali na one bele krpice naokolo s kukicon štrikane, tobože, da i to bude unako lipo za vit. Ali nati mod su oni lipi domaći vrči doživljevali i svoju sudbinu. Dricivali su se svajdi samo da ih oči ne vidu, boj je to tobože pomalo bilo zaostalo i starinsko. Pomalo bi se rivali va konobe, a šempre su bili i na smetlišće hićevani, razbijalibi se i nestajali, na žalost.
Za lipo vit
Ali evo, malo po malo pa je jopet njihovo vrime arivalo. Ali nisu se vrči nanovo počali tornivat zato boj da će se šnjiman nanovo i pit. Ne, nego zato boj su ljudi počali viđevat tu njihovu starinsku lipotu, pa bi se poradi te lipote i nanovo prezentivali, oću reć, jušto samo za lipo vit. Pa još ako bi na vrču bilo i ime od gazde (tobože ono – pij Pere, oli pij Ive i tako već), e unda bi tekar to bila prava lipota. I ponos domaćina, dabome….
Sve je to lipo, ali meni pade napamet još jedna stvar. Tobože, da more lako bit da su muderni stakleni žmulji mogli bit zaslužni da su ljudi počali i manje pit. Oli bolje reć da su bili manje pijani nego oni naši stari. Varamente, naši stari su mogli više i pit boj je i vino bilo domaće i zdravije. To je jedna stvar. A drugo je, da kada su ljudi pili z jendoga vrča, nikad se ni moglo vit kuliko je ki popil. Nagneš vrč i putegneš kuliko moreš, tornaš ga nazad na tavlu, ali se ne vidi kuliko si putegnul. Pa tako i više puti, ali nikad niki nezna kuliko je ki popil. Vrč se varamente brzo sprazni, ali svi su pili z jednoga, pa ki bi vrag znal meru kuliko je ki popil. Ali dočim su arivali žmulji va modu, oni stakleni dabome, unda je svaki pil od svoga žmulja, pa se je lako moglo imit navar i brojit, ki je i kuliko žmulji hitil vasebe. Sve je bilo na prezenci i sve se je vidilo. I dabome, unda ni bilo druge nego pit uz malo više krijance, pa bi se zlilo vasebe, more bit i par žmulji manje nego ono kada se je pilo z jednoga veloga vrča. Ali, valja reć da baš i ni svaki ni za to bacigal, nebi svaki imil krijance, pa bi više puti i stakleni žmulji znali čovika va potok obalit.
Piše: Joso Fafanđel, za Kantunić, 14.10.2023.
