I evo ga na!, ma ki je rekal da neće i osmi misec na kanatu arivat. A zaviril san poradi toga malo i va katolički kalendar, kad jušto va njigovomu zadnjemu danu piše da je to 31. osmoga i dan od Blažene Divica od Suz. I eto ti ga na, mislin se ja, kuliko san se puti jadal na osmi misec, a najviše da je bil vruć i bez dažja, da mi te blažene suze dojdu ma jušto kako naručene. Pa unda govorin sam sebi: Ma ni mi druge nego ću unda i ja toga zadnjega dana, duron samo plakat. Oštija, ma ne poradi žaljenja ča osmi misec pasiva nego poradi veselja i radosti ča ga se toga dana liberivamo. Boj gostiman varamente je bil po volji, tobože vruć i nedaževan. Da, njiman da, ali meni ne! Ako ćemo pravo, ma gorega osmoga miseca od ovoga još nisan doživil. A bit će da je i un sam to šerval pa je na kanati, prije nego ide ća, zlil malo i dažja na nas. Ma, ala šu i ni baš malo, boj govoru da je tih dan na Rabu palo jedno sto litar na kvadratni metar. A to je puno. Ali zemlja je bila tuliko suha i žajna da je to popila unako, na tir, na eks – kako se ono reče. A hurbasti misec je unda mislil da ćemo zaburavit onu njigovu vrućinu i da ćemo ga na kanati pozdravit kako heroja. Ali niš od toga, ni mu to pomoglo, tako da san ja na Dan Gospe od suz, molal za njin ne suzu od žalosti, nego suzu radosnicu, kako ono i piše va kalendaru.
A kada san već viril va kanatu od osmoga (od agušta) unda san va kalendaru zaviril i va prvi dan od devetoga miseca. I znate na ki mod se je un začimal? Na mod da prvoga dana va devetomu tamo va kalendaru piše ne Divica od suz, nego samo ime – Branka. Ma bravo, mislin se ja, Branka je ono lipo ime od moje nevče, a moja nevča je dobra ženska, pa računan da će tako dobar bit i deveti misec ki se zotin imenon i začimlje.
OGLAS
OGLAS
I evo ga, dveti jušto kuri, jopet malo tepal, ali ne kako onaj smamnjak od osmoga – od agušta. Varamente ja san duron govoril kako je za mene deveti misec najbolji od svih va godini. Ala šu, mogli bimo mu nadodat i onaj šejsti ki isto zna bit po meri čovikova gušta. Ali potle vrućega leta deveti nas nikakor daruje z manje gradi od teplinje, pa odahnemo, laglje zdišemo. Oštija, a ne govorin to napamet nego i ja iman već puno godin va guzici (da prostite) pa san taj gušt i lipotu puno puti i doživil. I ne samo doživil nego nisan mogal od manjega pa san jednoga lipoga jutra to i za moj jedan libar zapisal. A toga dana mi se je dogodila ne samo štorija od lipoga dana nego se je još jedna ćakula na sve to nadodala. A, zapisal san da mi nećete virovat kako je sada na kanati od leta lipo poć na more. Tiho je zjutra, bonaca kako da mora ni, a sunce se pomalo diže zgor Velebita. Obala zelena, žal miruje, a more je ne samo mirno nego i bistro kako suza. Šoto dno se vidi, oni črni ježići leno se miču, travina šoto hruste samo se lela, a ona lipa i šara žotrica na prešu zna uteć od jedne va drugu bužu. Jedino ona mala bajica ima kuraja pa se oće poprtit na nogu i z dobre volje će se malo z vamin i zaigrat. Črška više ni, pa se i tići bolje čuju okolo va gušćacu, a gori visoko, lastvice već igraju kolo, dozivaju se i šapuću – bit će da se pomalo i one za svoju prtencu parićivaju.
A galebi!? Ma na ki mod moren galeba ne spomenut! I onio se svakuder prezentivaju. Zgora letu, i ki put zakriču, a doli na moru mirno plavaju na bonaci, oli se jako naretko i za kon ribicon zaletu. Da, ma kako je lipo tu sliku gledat i sve to z velin gušton doživit!
I unda, pun te lipote i veloga gušta sedin ja istoga jutra na dvoru z dva prijatelja Dalmatinca: Krsta i Anta, a oba rapski zeti.
Sedin šnjiman i povidan in kakovo san lipo jutro na moru doživil, kako mi je bonaca dušu ličila, lastavice i tići pivali i kako su i galebi kolo mene letili. Nisan sve još ni rekal, a već vidin kako me Krsto fiso gleda i grišpa oči. Pa dočin san finil un će nato: Ajs kvragu i ti i galeb! Ja san jučer lovija ribu u kanalu, a galeb mi je sija na kaić, pa mi se na provi grubo posra, odnija ga vrag dabogda!
A njigov prijatelj Ante, znajuć kuliko je škrt, vreda mu grlato govori: E bravo, ma baš ka da jemene pita! Škrt si ka đaval pa ne bi dal galebu ni ribicu izist. E da san ja galeb… ma baš bi ti za dišpet cili kaić posra! I dabome, oni kolo nas ki su to čuli svi su se latili smijat, a ja još najviše kada san vidil kako je moja poezija o lipomu danu na kanati završila. Oću reć, kako je mali korak od lipote rajske bonace do posranoga galeba. I još mi je Ante na kanati poručil: Ajs kvragu ti i tvoja lipota! Ma znaš ti ča je lipota? Lipota je doć u Split i gledat Ajduka na Poljudu. To je lipota!
Inšoma, to van je tako, svaki na svoj mod ćakulu o lipoti povida. I neka, samo neka lipote ima. A na namin je da se i naprvo borimo kuntra smetlišća i na moru i na kraju. I svi najdimo komad lipote i za sebe. Dricajmo otrovna smetlišća i ne zaburavimo da je i posrani galeb na svoj mod isto lipota!
J. F.
OGLAS
OGLAS
