Foto: Ilustracija
Evo, kanata je od godine i vrime od božićnih užanci, a ja svako to malo čujen motorić od našega poštira pa tečen na dvor da pošpijan ča mi je va onu kašeticu od pošte porival. Dabome, čekan čestitku od prijatelja, oli fameje ča se je po svitu rastekla. Ali kada kašeticu otvorin, duron nutri najden jedino one kartine od reklam i punu šaku računi. I unda se mislin: Bože moj, i to se je prominilo! Niki nan više ne piše, jedino banke, uprave poreza, sud i oni ča nan prodaju vodu, letriku, oli telefun. I tako mi se va zadnje vrime dogaja da, dočim čujen motorić od poštira, vreda me strah lovi.
Napisal: Joso Fafanđel Arhiva RL-a br. 24 (prosinac 2013.)
Jadni naši poštiri, nisu ni oni više ono ča su bili. Ni krivi, ni dužni! Žalin se tako niki dan jednomu, a un mi na isti mod sve to potvrđuje, pa mi govori: „Ma znaš ča, dojde mi ki put da poštiru namestin brukvu na putu da mu se guma skrobuža pa da me ne jada z oniman brinciman od računi ča mi ih na dvor nosi.“
Eto, vidite, to je to. To je ono ča mi potvrđuje kako se je puno toga prominilo. Sve čestitke danas šaljemo jedni drugiman z mobiteliman, oli priko interneta. A oni naši stari poštiri nisu vozili motorići, nego su z onan velon torbinon priko ramena na noge hodili od vrat do vrat, od dvora do dvora. Ni bilo vani onih kašetic za poštu nutra porivat pa bi poštir redovito svakoj fameji pokučil na vrata i najprvo bi in „Bog daj“, oli „Dobar dan“ poželil. A svi smo ga rado čekali, znajuć da će nan donest kakovo pismo ko smo odavna čekali, oli daj Bože kakovu penzijicu, oli pripomoć. Pa ako je vrime od marende, unda s poštiran popit bićirin rakije, a ako je arival potle ubeda, unda žmulj bevande od onoga vrča ki je vajk bil na tavli pruntan. To je posal, a ne ovo ča se danas dogaja! Kako da nas malo toga jada pa još moramo i od poštira drhtat i strahovat.
Evo, zato ne moren od manjega da jušto ku besedu ne rečen o jednomu našemu starinskomu poštiru. Svi smo ga va Drazi zvali Petriš, a odavna je već, nažalost, i un na drugomu svitu. Čovik mali, a torbina vela i ni bil od velih besed. Ali pošta je bila redovita. Ako bi došal na dvor, a nikoga ni doma, imil je užancu zamotat va pismo malu stenčicu, vezat to špažićen, pa hitit kuću kroz otovoreni barklun na gornjemu podu. Dabome, da na ti modi obavi posal, a ne gubi vrime pa da se ne mora nazad tornivat. Ali pametin ja kada san bil mali diško, otac je šal na žrmadu, a ja z materon grad na pijacu. A kada smo se z Grada doma tornali, mat se je šla gori na pod preobuć. Ali čujen ja ozdola kako jadna potiho nikoga proklinje. Kalala se je s poda doli i vidin ja da drži va ruci pismo i jedan lipi komad stene pa više sama sebi nego meni govori: “Ala da je Petriš poludil? Ma ča nan je ovo učinil?“
A znate ča se je dogodilo? Barkun je bil zatvoren, a siromah Petriš to valjda ni šerval pa je s pisman zamoćenin va sten razbil laštru na barkunu. A bila je to za ono vrime vela škoda. Zato je otac i bogoval dočim je doma arival. Boj, tobože, kako da nima ča čint nego još mora poć Grad kupit staklo i zgubit pol dana za laštru stavit na mesto, z brukvicamin je šaldat i sve naokolo štukon zalizat. A znate kako je na kanati završilo? Kada je naš poštir Petriš nanovo arival, tribalo je samo deset besed i već su se oba žmuljiman nazdravljali.
Inšoma, zato ni za čudit se da smo se jedanput poštirima, ne samo veselili, nego su se na njihov račun i sulaci žventivali. Svi znamo, tobože onu starinsku navadu, kada su ljudi hodili na ribu i virovali da se prije partence triba ženi z rukan mednoge va onu stvar popačat. Ako to ne učiniš, niš od lovine.
Partil je takojedan na more, odvezal je kaić i ni desetak put z vesliman zavezal, kad domisli se un kako je zaburavil ženu za onu stvar agvantat. I ni druge nego voga nazad, nanovo kaić vezat i zateć se doma, boj bolje je i to nego na more poć, a niš ne ćapat. A žena se je digla i već na dvoru unako prignuta pere robu va kablu. A un se došuljal pomalo i pomuče ozad, da ga ne bi odbila i ćapa nju med noge. Ona se je samo malo stresla boj znala je ki je, ali njemu je bilo suminjato. Prominil je glas, pa je govori:
– Ala, pogodi ki je!
A žena se nasmijala, pa govori:
– A ki će bit, nego ti, vraže poštir! Ma ča si već došal?
A eto, sve se je prominilo, pa ni toga danas više nima. A prije, va ono strarije vrime, po kućah je hodil, ne samo poštir Petriš, nego i onaj Loparanin Iveškić ki bi hodil rubat, ča oće reć, kupit šoldi ča su ljudi za porez dugovali. Nažalost, i to se je prominilo. Iveškić je odavna umrl, a doma nan sada ovrhe kalumivaju.
Ben, ma evo za kanatu još jedna domaća štorija. Moja pokojna baba (po materi), ku su zvali Gospica, dobivala bi od Općine niku malu pripomoć. Va zadnje vrime već je slabije i vidila, ali bi kolo prvoga redovito čekala poštira. I ukoži ona jednoga dana, unako kroz maglu, kako čovik gre po putu i maše z velon torbon va rukah, pa mu veselo govori:
– Ala, lipi moj, ala! Ako mi nosiš sirotinju dojdi vreda vamo, boj ja najviše volin kad su šoldi va mojiman rukah!
A čovik je od puta odovara:
– Ni baba moja, ne, nisan van ja poštir. Ja ne nosin šoldi nego ih vazimljen!
– Ala da si to ti, vraže Iveškiću?, pita ona njega.
– Je, baba moja, je, ja nisan Petriš, nego Iveškić.
A baba je unda digla obe dvi ruke va zrak, pa mu govori:
– Unda parti naprvo! Hodi vraže ća od moga dvora, da te moje oči ne vidu!
I eto, ovih dan se i godina minja pa ni druge nego van zaželit onu najveću prominu: da nan sviman bude puno bolje, nego ča je va voj pasanoj bilo.
Napisal: Joso Fafanđel Arhiva RL-a br. 24 (prosinac 2013.)
