Foto: Andrina Perić
Ovih dan smo va daniman od Sisveti i Dušnoga dana, oli Dana mrtvih i pokazat ćemo poštovanje svima oniman ki više nisu med namin. Nisu uz nas, ali mi smo duron šnjiman, uz njih, pa su na taj mod i oni duron snamin. I bit će tako za na vike vikova, dokli bude živih onih ki ih ne ćeju i ne moru zaburavit. S pravom se zato reče, da dokli smo mi živi i oni su živi i s namin i va namin.
Piše: Joso Fafanđel, za Kantunić 1.11.2025.
Gren po stazamin od groblja, od groba do groba i pazin njihove slike, pa se pomalo i čudin kuliko pokojnih poznivan. Kuliko je do sada za moga života puno ljudi živilo z manon, oli ja šnjiman, a oni više nisu med živiman. To me je natiralo da napišen i jednu pismicu o tomu. Više san je puti prezental pa ću evo i sada. Ma potlilje, oli na kraju, ne sada. Ali oću reć, ako čovik pozna puno pokojnih, to je unda sinjal da i un već ima lipe godine za sobon. Ča se mene tiče – neka, neka ih iman. I neka se one samo kako brime naprćuju na moja ramena. To brime, ako je čovik zdrav i još more, lako ćemo na plećiman potrpit.
Zato su ovi blavdani na svoj mod i dobro došli da nas na puno toga avizaju, pa i na to da i mi živi moramo jedni drugih poštivat, a na mrtvi nikad ne zburavit. Moramo i sebe poznivat, znat uvik ki smo i ča smo. Zato lipo ona domaća poslovica va riječniku Željka Perana govori uvako: Čoviče bit će bolje kada doznaješ ča si: jesi bačenka, oli si kušin.
Postole za Svi sveti
Inšoma, danas ću začat ćakulu i o jednoj drugoj stvari, a to su postole. A to zato boj san zapametil, a i va libru momu zapisal, onu lipu ćakulu o čoviku ki je priz blavdan od Sisvetih šal kod postolara naručit za sebe nove postole. Pa dočim je arival va postolariju, pita njega postolar:
– A ča je vas lipoga kod mene dopeljalo?
– A blizu je blavdan od Sisveti, pa san došal naručit nove postole, boj me je već sran hodit okolo i na misu va oviman mojima okrpaniman.
– To pari, govori njemu postolar, da bi te vi naručili postole za Svi sveti.
– Da, šjor moj, nove postole za Svi sveti. Ali imite navar ve, za Boga, da ne budu male!
– A dobro, govori njemu postolar, iman puno posla pa dojdite po postole za jedno dvi šetemane.
Pasale su i tri šetemane i dojde čovik kod postolara zet nove postole, kad ima ča i za vit. Postolar je učinil dvajsetak novih, ali malih postolov, i jedan par jušto pol metra dug. I čovik se je latil za glavu, pa napade postolara, da če je to učinil, boj da je un naručil samo jedan par postolov i to za sebe.
– A ne, govori njemu postolar, ti si naručil postole za svi sveti i jedan par za Boga. Da, i još si me avizal da neka iman navar da one za Boga ne budu male.
Ča je potle bilo ne zna se, ali jako su se krivo razumili.
A jedna moja mala štorija je jušto od ovih dan. Bil san, dabome i ja, uredit grobi od mojih pokojnih, kako doli va novomu groblju va Drazi, tako i gori va onomu staromu ko se od ceste i ne vidi. Sakril ga je gušć okolo, ali ovih dan je i to malo groblje uređeno kako triba. I jušto tamo na tomu groblju san nabasal na jednu mladu žensku s malin diteton. Dabome, bili smo sami pa smo razminili i par besed. Najprvo ona govori kako je ovo groblje malo, ali lipo, kako je zanimljivo i da bi ga tribalo uredit kako muzej. Dabome, ja san se zotin vreda složil, pa je govorin kako ja svi ovi pokojni ča su kolo nas, kako ja njih do jednoga poznan. Ona se je malo začudila, ali je nadodala da to baš mora bit lipo tuliko ljudi poznivat. A ja san je rekal, kako lipo je, ali da je na svoj mod i grubo, boj da bi svi ti pokojni poznival moraš i ti već lipe godine imit. Ali ona me je pofalila da se ja još dobro držin i to mi je bilo jako drago za čut. A fala ti, lipa moja.
I za kanatu, kako ča san obećal, evo ione moje pismice ka se jušto tako i zove – Dušni dan. Za nas i naši pokojni, na taj dan ki nas i na ovaj mod na njih spominje. Uredili smo grobi, donesli puno lipih mrtvaških rožic, nagorili smo sviće, spomini su nas na jedan mod rastužili, a na drugi jopet i malo dušu napunili. Nadan se da i ova moja pismica sve to na svoj mod govori.
DUŠNI DAN
Pasal je tako lipi dan
S puno sunca
I tepal,
Jušto kakovoga su mrtvi
I zameritali,
A ja san samo rekal:
Spite,
Sanjajte,
I počivajte,
Va vašoj mirnoći.
Grobi su
Puni cveća
I sviće su se nagorile,
Molitve za pokoj se čuju,
Spomini letu,
Daleko putuju,
Išću vas,
Oćeju se z vamin kuntrat,
A i večer će jušto arivat,
Bit će veli mir,
Samo će tić na čimpresu
Tiho i samotno
Zapivat…
Piše: Joso Fafanđel, za Kantunić 1.11.2025.
