Foto: RabDanas
Otil bi malo o libru ćakulat. Ali ćakulu je zapravo začal Željko Peran, a ne ja, ali evo – potle njega i ja ću na svoj mod. Ča se je dogodilo? Potle puno vrimena Željko je finil onaj njigov libar koga je nazval Požmarane besede. Da, dobro ste šervali, ne požmarene, nego požmarane..
Piše: Joso Fafanđel, za Kantunić, 22.10.2025.
A i jedno i drugo bi parilo da su to riči ke su zbledile. A zač tako, va libru je i to rečeno. Željko govori da je tu rič požmarane čul od starih ljudi, ali da je već ni nanovo čul i više od 40 godin. E jušto zato da je tu rič stavil va naslov od libra, ali već nutri na prvin stranicamin napisal je onaj noviji naslov, tobože ne požmarane, nego požmarene. Ali to je manje važno, boj važnije je da je va libru skupljeno baš puno i tih nidanjih starih domaćih riči ke su odavna već zazbilja požmarile, pa se više malo i duperaju. A ja bi rekal, da se puno od svih onih riči va libru isto danas sve manje dupera, tako da san i ja na više njih nabasal i diboto da ih nikad va životu nisan ni čul, a kamo li duperal va govoru. To unda govori da imamo puno starih, ali i novih ke isto pomalo bledu i požmaruju.
Mladi ljudi danas sve više govoru ono ala pol tića, a pol miša, ča oće reć da va govoru med domaće riči stavljaju mišano i one književne ča ih va školamin uču. Na ti mod govor po domaću ni čist, nego je mišan i zamišan, tako da kod njih ima još više onih besed ča su i va novije vrime požmarile. A požmarile su zato boj se sve manje duperaju, pa unda kako i svaki alat ki se malo koristi, sve više ga malo pomalo rđina poida.
Ali ovaj Željkov libar će pomoć da sve budu va libru timbrane, i one ča su za govor odavna požmarile, a i one ča ih dica danas sve manje duperaju. A libar je veli, dosta piza, a i debel je. Ma ni se zadebelil od vele spize nego od puno besed ke je Željko skupil na kup i va njemu prezental. A škapulal je i va libru prezental ni manje ni više nego 18.000 domaćih rapskih riči. Kako ča san već rekal – i onih požmarenih i onih ča se i dan danas duperju. Zato se za ovaj veli libar i reče da je to zapravo rječnik govora rapskog. Oli drito rečeno rječnik govora naselja od Grada Raba, a to su Barbat, Banjol, Rab, Palit, Mundanije, Kampor i Supetarska Draga.
Šervali ste dabome da nisan spomenul jedino Lopar. Ali ne, nisan preskočil, nego je to zazbilja tako – Lopara i loparskih riči ni va ovomu libru. I vreda ću reć da je, po meni, to vela škoda. Ali tako je. I sam Peran je zapisal da je još va osnovnoj školi šerval kako Loparani govoru malo drugojačije nego druga mesta na Rabu. A urednica libra Nataša Šprlje, zapisala je i ovo: Rapski govori zastupljeni va ovomu rječniku med sobon su prilično homogeni i med njiman nima vele razlike. Jedini govor ki je malo drugojačiji od drugih govor je od mesta Lopara, a to ne začuđuje računajuć na prostornu odalečenost Lopara od drugih rapskih naselja. Makar govor Lopara ni stavljen va ovaj libar, va opisiman se isto spominju razlike loparskoga govora ke su vidljive kako drugojačije od govora drugih rapskih naselja…
Napomenuto je i to kako loparski govor merita da ga se opiše i stavi va jedan celi drugi libar. Ja se zotin zasvin slažen i volil bi da se to ča prvije i dogodi. Boj ako govorimo o rapskoj čakavštini, oli rapskomu govoru, unda jako fali i taj loparski del. Dabome, boj po govoru smo svi jedno telo ko pripada Rabu kako zajedničkomu otoku. A virujen i ja da je teško pisat o dijalektu koga manje poznaš. Ali ne samo dijalekt nego i ljudi ki ga duperaju. Pugotovo ako ćemo va rječnik stavit i one požmarene besede toga mesta. To su one besede ke se malo duperaju, oli se danas više nikakor ne moru čut. Za tornat nazad te besede, zapisat ih i stavit va libar, za to triba poznivat stariji ljudi jednoga mesta i sa sviman njiman pomalo porazgovarat. Ova druga mesta na Rabu jesu malo bližja jedna drugima, ali vidi se i po ovomu libru da je Željku isto to bil problem, tako da je više besed našal va Brbatu i Banjolu, a na sazmorcu manje. Recimo rič bomba, je po njemu domaća, kako i bombardirat, ali z’ove bande na sazmorcu govori se ne bomba nego bumba, pa se unda i bumbardira. Ali to nisu žbaljade, nego va uvako velomu poslu, valja priznat, teško je baš sve drugotnosti stavit na svoje mesto.
Da ne spominjen da va govoru našega trajanja na otoku ima i puno drugih mišijancij. Peran spominje i takozvani venecijanizam, ča ni za čudit se ako znamo da je Rab bil puna četiri vika pod vlašću nidanje Venecije. A mišavina govora Venecije i Raba najviše se mogla čut Gradu (kako rečemo za grad Rab) med Kicarima, ali danas na žalost i njih ima sve manje, pa i taj govor pomalo požmaruje.
Ali zatire se pomalo i onaj govor nas zvan samoga Grada, boj mladi ga još govoru, ali sve manje starih besed duperaju. Tako i Peran prizna da se ovaj naši izvorni rapski govor ipak malo bolje očuval z’ove bande, na sazmorcu, va Kaporu Dragi i Mundanijamin.
Bolje sam nego slabo kumpanjan!
Ali evo, mene veseli još jedna stvar, a to je, ča je Peran va ovomu libru zapisal ne samo besdede domaće, nego je nadodal još i poslovice i uzrečice, igre ke su se igrale po kućah i kolo kuć, pa unda još i kljatve ke su se mogle, a i danas se moru čut po celomu Rabu. Znana je ona – Ča lud zagrampa, to sto pametnih ne more odgrampat. Oli kada ljudima činite dobro, a ljudi za to ne haju, unda se reče: Čini dobro, poji govno! A ako je ženska poganoga zajika, da bi se znalo reć uvako: Kada bi pljunula, celi bošak bi važgala! A meni se je i ova dopala – kada čovik puno govori i laje, bolje se vidi kakov je. A poslovica starinska o tomu govori uvako: Ča se više prignjuješ, više ti se i guzica vidi.
Da, to je mudar i skarsi govor našega čovika, kratak ali va komu se puno reče. I još to unako na mod smiha i sulaca, do čega su naši stari jako držali. A ča ćeš bolje od onoga malo prvo, tobože, da ča se više prignjuješ više ti se guzica vidi. Imili su naši ljudi duha i smisla za stvari i na taj mod reć. A to zato ča su znali sve i na vagu stavit. To pokažuje i poslovica ka govori: Bolje sam, nego slabo kumpanjan. Oli – da je jadan kaić ki vesla nima. Oli: Kadi se tovar tače, tamo i dlaku pusti. To govori da čovik more čint zlo, ali da se na kraju sve vidi i doznaje. Pametna je i ova: Ni siromah onaj ki malo ima, nego onaj komu nikad dosti ni. A onaj ki voli badat va tuji posli neka posluša i ovu: Svaki neka svoju vrčinu pod svoju postilju drži. Dabome, a o lažima da se ne govori. Laže se danas, lagalo se je i prvije, ali se laži i doznaju, pa bi ljudi mudro va sulacu rekli uvako: Svaka guzica dojde na kundot!
Inšoma, valjha priznat da je Peran učinil veli posal, pa kapa mu doli na tomu velomu trudu. Bit će korisno da se libar malo i na dublji mod prelista, a još više i proštudija. Pa ako se najde da je ča krivo, a malo će toga bit, oli da ča fali, a toga more bit, unda neka to bude sinjal da libar triba nadodat.
Dabome, zamirit mu nećemo nego mu za prvu ruku svi moremo samo zafalit na ovomu korisnomu i velomu poslu. Ako se mene pita škoda je jedino ča se na promociji libra desetoga ovoga, ni mogla čut ka domaća beseda više, oli govor po oniman besedamin ča su va libru timbrane. Boj, od veloga libra ki ima 840 stranic i 18.000 besed ni se prezentalo, a diboto ni jednu jedinu od tih besed. Ki je za to kriv ne pačan se, baren ne za sada. Ali kada već spominjen poslovice, jedan od njih govori i uvako: I va raju, sve se tajne doznaju… Da ne spomenen i onu: Puno puti je bolje držat vodu va rilu…
Piše: Joso Fafanđel, za Kantunić, 22.10.2025.
