Foto: Arhiva RL-a i Hrvoje Hodak
KIRNJA
Kuntrivan ja jednoga jutra Pera Sandalića. Dočim me je šerval latil se je za svoju velu torbu, znel je van sliku i jada mi se kako je još prije četrdeset godin latil na pušku jednu velu kirnju. Ma riba od desetak kili. Ali, njigova kumpanija od Grada to da mu ni dan danas ne prizna. Hitil san oko va tu sliku i je: na slici Pere od mladih dan, vela duga puška i ta vela riba va ruci.
I povida un kako su još prije četrdeset godin šli na pušku lovit ribu, un i Miljenko Domijan. Doli pod Lun na desetak metri dubine zanjoril se je Domijan, digal se je gori i da vas zapušen govori:
– Ćo Pere, doli je jedna vela riba. Pucal san, ali je od buže nebi vrag van zgulil!
Zanjori unda i Pere, pukne i un harpun vanju, puteže, ali jok, ne gre. Kirnja se je zaglavila i ne more je vrag z buže van zgulit. I ni bilo druge, nego ribu molat i poć pomalo doma. A zvečera, dabome, odmah je o tomu počala ćakula i vreda se je složila druga kumpanija ka će zutra jutro poć ribu z buže van zgulit: Domijan, Bepo Fafanđel, Viktor Kaloćira, Pile i još niki. Tobože, veterani i veli majstori od ribarije.
Ali, drugoga dana evo njih već kolo podne nazad na rivu i još od kajića svima daju do znanja:
– Ne, ne more se, nima od toga niš! Triba tu ribu zaburavit i gotovo!
Ribu su prepoznali i potvrdili su kako je to jedna vela kirnja, a nju kada pogodiš, falu se oni svojin znanjen, ona se samo napuše i ne more se nikakor z buže van zgulit.
– E, a ja, povida mi Pere Sandalić, ja san lipo našal moju kumpaniju i šli smo mi drugi dan jopet kod kirnje. Zanjorimo, i evo nje doli na istomu mestu. Pukli smo svaki svoj tir va nju i daj vamo, daj tamo, pa smo je pomalo van zgulili.
I dabome, kirnju brzo va kajić i tuta forca kuntra Gradu. Veselju kraja ni. Koštali su uz rivu, ljudi se skupili, naručili su i slikara i evo slika je i dan danas va torbi.
– Svi su to vidili i svi to znaju, jada mi se naprvo Pere Sandalić, a oni i sada potle četrdeset godin govoru, da to ni istina. Još in to i Pišturić potvduje!
Ni druge nego ću tu sliku povećat, stavit ću je va kvadrić i obisit kod Dukine va butigu. Neka svaki božji dan nanovo gledaju i neka se zna ki je to onu velu kirnju z mora digal. Ja, Pere Sandalić!
ŠKRPINA
Jedne lipe večeri našal san se va vridnoj i veseloj brbatskoj kupaniji „Dolin”. Na vičeri ku su varamente i zaslužili. A potle vičere jedni igraju karte, drugi ćakulaju, a Bepo Karabaja se na kartaši na vas glas ljuti.
– Ala Bepo muči, ne hitaj mrčilo!, šempre ga je koril Marijan Pičuljan.
Bepo unda sede domene, pa mi povida storiju ka mu se je dogodila jušto zovan iston kumpanijijon.
“Dolin” je parićal godišnje ribolovno takmičenje va Brbatskomu kanalu, a Bepo je svojin kaićen šal šnjiman. Ne se takmičit, nego unako za spas. Lipi je dan, ali riba se slabo lovi. Kaj-tadi ki ćapa maloga arbunića, šparića, oli široku menulicu.
I Bepu je takov lov dojadil pa je kroz podne molal tunju mori i šal va kabinu malo odmorit. Kumpanija je to šervala pa su se pomalo dovezli do njigove tunje i na svaku udicu nadili su mu maloga krepanoga arbunića. Digal se je Bepo potle nikoga vrimena, rastegnul se je na kaiću i gre tunju obać. Potegnul je najlon, teško je i počal je po njigovu trubit:
– Dica, ja san niš velo latil, a vi se mislite!
A oni drugi z bande špijaju i pucaju od smiha. Bepo je to šerval, ali diže tunju i jopet trubi:
– Samo se vi smijte, ali meni je teško i ja dižen ribu!
A kada je Bepu tunja došla van, svi su zamukli, pasal ih je veli smih. Bepu je na udici visila škrpina od 2,5 kila. Latila se je na oni krepani arbunići ča su ih na njegove udice za sulac nadivali. Svi su pazili jedan va drugoga, kalali su glave doli, a Bepo se je smijal i trubil da ga je bilo čut sve do punte Frkanja.
Ali te večeri parićali su oni i vičeru. Bepo je vezal škrpinu na špažić, celu je večer šnjon mahal i svih njih pomalo jadal. A za vrime vičere obisil je ribu malo zbande neka je svi gledaju. I vičera je pasala, ali je i škrpina nestala. Vrazi su je za dišpet ukrali, a Bepo je učinil jako velu kriku.
– Ni dan danas se tobože ne zna, govori meni žalosno Bepo, ki je škrpinu te večeri ukral i va koj je kumpaniji potle požerena. Ali, sve se tajne svita doznaju, govori Bepo, pa će se i ova doznat.
A Jože Štokić je to čul, pa se je z bande počal smijat. Bepo je nato skočil pa je z prston uprl va njega:
– A i ti si je, prijatelju, baren malo kušal!
A Jože mu kroz smih govori:
– Ja ne, ali san čul povidat kako je lešada bila jako dobra! Jedino da je ona njezina muljica malo tvrdasta ostala …!
A kuliko je i potle Bepo na njega kričal, to i sami morete znat. Inšoma, tajne se, pari mi se, ni dan danas još nisu doznale.
