Foto: RabDanas
Malo je odažilo i ovih dan smo svi skupa zaredon puno spominjali jesen. A ni čudo kad je i arivala. Mi na otoku to malo težje moremo priznat, boj za nas na moru se more reć da leto dura dokli duraju i one mase gosti med namin i kolo nas. Pa dočim gosti idu ća, svojiman kućamin, za nas kako da se tekar unda jesen pomalo šulja, a leto fermiva.
Piše: Joso Fafanđel, za Kantunić, 27.9.2025.
Ben, ma prvi sinjali za kanatu od leta dogajaju se još puno prvije, a to su oni sinjali i ono vrime kada naši črški promuknu i fermaju pivat. A za mene i jesu najveći sinjali ono ča nan priroda poručuje. Za leto su to črški, a za jesen lastavice.
Dokli ja moren šervat lastavice va zraku, a vidin ih svaki dan, pari mi se da jesen još ni arivala. Službeno je mogla arivat, ali lastavice govoru da je još teplo i da sve ovo za njih više daje na leto nego na jesen. Ali ni straha, dočin malo zahladi, lastavice ćeju učint onaj veli sastanak kruženjen visoko va zraku, a to je zapravo njihov dogovor za partencu, za putovanje doli va tepliji kraji. Nadan se jedino da i one znaju za ono zlo ča se dogaja va Palestini i da ćeju se i one na vrime dricat od te vele čovikove ludosti. Ni straha, znaju one sve kadi se ratuje, ali i kadi su i malo mirniji kraji za živit. E pa sretno in bilo, i njiman i oniman jadniman ljudiman ki ne moru letit nego patu i ginu po svojiman kućamin i dvoriman.
Nisan zaburavil spomenut i našu znanu malu i lipu tičicu ku mi zovemo pitirina, a to je zapravo čučka-crvendać. Da, da, boj jušto ta mala pitirina još je najbolji sinjal prirode ka će nan reć kada je zapravo arivala prava jesen. Prava jesen je kada malo zahladi, a dočim je malo mrzlije, evo ti ga na, i pitirine tancaju po kitamin kolo nas. Naročito pridvečer digne se ona visoko na vrh ča većega stabla i pomalo i tiho cvrkuće, ma jušto kako da zna kuliko to mene veseli i daje mi kuraja. Ben, ma to san otil reć, dokli ni vit pitirine kolo nas to je najbolji sinjal da zapravo još kasno leto dura, oli jesen, ma jako rana.
Ostale su samo masline
A govori se okolo da bi na jesen već tribalo vit i malo više posla po Rabu. Ali kako da smo još malo umorni od leta, pa većega laura još ni za vit. Sporta ima najviše, a i zadnje fešte se dogajaju, kako ona Kampori od Eufemije, tako i ona va Mundanijamin, od sv. Mateja. Otvaraju se i izložbe, a prikazuju se i nove knjige kako ča je ona od našega Kreša Butkovića. Bravo i kuraju Krešo!
I sve je to lipo i za čut i za vit, ali, govori mi jedan, da još ni za vit niš od onoga tobože malo većega laura kadi se moru šervat i bageri i one vele dizalice. Ali ni lipo kritikat, boj ako je naša najveća tvornica na otoku jušto turizam, unda smo sve do sada bili debelo va velomu poslu. Laurali smo navelo po onoj najvećoj vrućini i žegi. E, pa unda je sada i vrime kada valja zet malo zraka, malo se odmorit, počinut i odahnut. A baren dokli su još lastavice kod nas, ali kada pitirina ariva, unda bi dizalice već morale bit va zraku.
A čega su se naši stari najviše lovili va ovo doba godine? Dabome, najveći posal je bil pobrat ono ča je rodilo. A to je najprvo krhatva od frmentuna, a potle i trgatva od gorzja, pa kuhanje rakije i sve tako redon. Malo potlije i masline je valjalo pobrat i ulje učint. A danas su od svega toga ostale samo masline, a i one se beru ranije nego prvije. A budući da svaka kuća danas ima i kaić unda je i ribarija na pameti, pa je i to nika sorta od odmora potle veloga truda i laura va sezoni.
Srdelice, agunići i lokardići
Inšoma, jušto mi zato i pade napamet ribarija. O tomu bi se dalo puno govorit. Najprvo kakova je ribarija bila prvije, va ona starija vrimena, a kakova je danas. A unda more bit još i više nego prvije valjalo bi na dnevni red stavit i cene od današnje ribe. Boj da ni Renata i Sonje i njihovih kašet od srdelic, agunićev i lokardićev malo bi ki danas imil ribu za ubrok.
Ala šu, govoru da je i ta riba skupa. Skupa je, ali kada se stavi kuntra cene od one druge ribe, kako ča su orade, lubeni, zubaci, moli, pa i veći arbuni, ligne i škampi da se ne govori, unda mu dojde da su te plave ribice, a diboto za niš. A i srdela i agunić i lokardić i nisu baš za hitit ća. A još da su i zdraviji nego ona druga, tobože bela, ali skupa riba. E pa unda ćemo mi lipo ist plavu ribu, tu ceniju i bit ćemo zdravi, a oni ki idu lubeni, orade i veli škampi, oni neka boluju, a ča in mi moremo.
A ča se mene tiče, ja ne moran ni poć na pijacu. Ja iman suseda ki se budi rano z jutra i da ne more bit na postilji, pa mi un redovito i ribu kupuje. Jutro me odmah zove čega sve ima na pijaci.
Varamente, va zadnje vrime sve manje me i zove, boj un je već naučil ku ribu ja volin, a i ku unda kupujen. I neka znate da redovito i pogodi. Jedina mu je falinga ča je malo debeloga uha, malo slabije čuje, a pugotovo na telehun, pa mu moran jako trubit, a unda me ribari prije i bolje čuju nego un i već se latu parićivat ono ča ja oću.
Dva Kamporca debela uha
E a unda mi pade napamet kako su mi jednn put povidali štoriju od nika dva stara Kamporca ki su isto oba bili jako debela uha. Bili su susedi na dvoru, vrata do vrat. A oba gluhi kako top! I jednoga ranoga jutra najdu se oni dva skupa vani na dvoru.
– Kaj greš Ive? – pita onaj ča je prvi došal s kuće van, ma ča greš na ribu?
– A ne, nego gren na ribu, odgovara mu onaj drugi. A onaj prvi da će jopet na to njemu:
– A neka, neka, a ja san mislil da greš na ribu….
A Komporci su vajk bili za sulac pa bi za ta dva njihova suseda znali reć ne samo da su gluhi kako top, nego da in se i jednomu i drugomu (da prostite) i tovar va uho oprdil.
Piše: Joso Fafanđel, za Kantunić, 27.9.2025.
