Foto: Lucian Borić
Inšoma, a vidite i sami ča se dogaja. Leto dura, gosti više od 20 hiljad, posla na sve bande i po danu i po noći, a mi na Rabu još nimamo ni celu vlast. Ma nimamo nikakovu, ja bi diboto rekal, nego samo gradonačelnika i na silu postavljenoga presjednika Graskoga vijeća. A oni dva i nimaju velu moć, boj su in najviše ruke vezane, ako ni one glavne vlasti, a to je Grasko vijeće.
To govorin zato boj, tobože, da su se ovi novo zibrani člani Vijeća, va sedmomu misecu i satali za prvi put, da bi zibrali i onoga ki će Vjeće peljat, znači presjednika Graskoga vijeća. Da, boj bez toga Vijeća kako da i ni. A i budžet za ovu godinu još nimamo. Ali to in toga puta ni šlo za rukan, boj su se jušto napol podilili, tako da ni jedan predloženi ni dobil većinu, a ona od Domivinskoga pokreta da je mudro zamukla. A kuliko je to mudro, ne pačan se. I sada sve valja učint jovo-nanovo.
A govorin to zato boj san ovih dan doznal da je novi sastanak za biranje prsjednika Graskoga vijeća dogovoren za petak, deveti ovoga miseca. To pari, sastanak nanovo za istu stvar. I sada je velo pitanje, ča će ovoga puta bit. Jesu se more bit naše stranke na Rabu ča to dogovorile oli će ju jopet svaki po svomu. Inšoma, reče se da va kući va koj dogovora ni, slabo se gre naprvo.
Tribat će nan jako puno dima
Zadnjega puta kada san o tomu pisal, spomenul san onu starinsku anegdotu, kada su naši stari takove i slične bolešćine reševali na mod da bi va latenomu katinu nagorili javora, luzmarina i kuša, unda bi va tomu dimu kurili onoga komu je bilo potriba. Govorilo bi se, da ako je ki šal malo na muhu, nakrivo, oli da mu posal ne gre, da ni druge nego da ga unda triba nakurit! Pa san i sam priporučil kako ne bi škodilo provat i ovi naši novi člani Graskoga vijeća malo nakurit. Va onaomu staromu latenomu katinu učini se lopata žerave, pa se na žeravu stavi malo kuša, levande, javora i luzmarina, a unda ih se natira da priko dima malo skaču. Oštija, ako niš drugo, a more bit da baren to pomogne. Ali sve se meni pari da nebi škodilo da se priko onoga dima va katinu malo latu skakat i glavari od svih naših stranak na Rabu. A i drugi, pa makar tribalo još par katinov javora i kuša nagorit.
Za svaki slučaj, ja ću već zutra nabrat malo i javora i kuša, pa neka se do petka, devetoga od ovoga, malo i osuši. Da, boj ako baren malo prevene, da unda puno bolje kuri. A sve mi se pari da će i ovoga petka tribat jako puno dima. I to gustoga.
Ovi mići komarci badaju ala vraga
Inšoma, pade mi na pamet kakao bi se zotin kurenjen mogla učin dupla korist, boj ne samo da bimo morebit naši pulitičari zličili, nego bi se na isti mod mogli zotin i kumarcov liberivat. Ovo teplo vrime kako da i njiman odgovara, pa zvečera ove godine nikakor sve više i više navaljuju. A jedan put su i kumarci bili oni veli, pa bi ga čul kako kolo tebe brnči, pa recimo po noći opališ sebi trišku, pa i njega zalipiš za lice. A sada su najviše niki mići navalili, oni kako mušice od vina, pa ne avizivaju da ćeju doć, nego se vreda lovu posla i badaju ala vraga i to najviše po nogah.
Niki dan san šal niki barkunić piturat, pa mi ni bilo druge nego san najprvo moral s trpentinon cele noge namazat i to in se, fala Bogu, ni njanci malo pijažalo, pa su se razbižali od mene. A ča je čovik deblji da ga još više napadaju. Zato vajk volin povidat onu Mundanisku ćakulu, kada su napolji dva od njih čuvali ovce po potociman. Jedan debeli, a drugi suh kako kostohiš, samo kost i koža na njemu. A unda odnaj debeli da zove oga suhoda, da ako i njega grizu kumarci, a un da mu govori da njega ne. Ma kako to, čudi se debeli, a mene su naživo pojli!? A onaj suhi da će njemu unako pomalo: A… ne moru mene badat ne! Boj bi in na meni puklo svrdlo…
Piše: Joso Fafanđel za Kantunić, 8.8.2024.
