Home Aktualno Rapski kantunić Josa Fafanđela | ĆAKULA I POTLE IZBOROV

Rapski kantunić Josa Fafanđela | ĆAKULA I POTLE IZBOROV

0
Rapski kantunić Josa Fafanđela | ĆAKULA I POTLE IZBOROV

Foto: ilustracija (H.H.)

Varamente, izbori jesu pasali, ali evo i potle njih triba reć par besed. Proćakulat. Ala šu, ma da su bili samo oni od Evrope, a nebi rekal brate njanci ni besede, boj o tomu je bilo puno halabuke po televiziji i mobiteliman.

A i nima se ča tudi puno govorit. Tude biramo svi va državi, pa ča se zibralo, zibralo se. Ljudi najviše govoru da smo njiman zibrali lipe plaće, a namin ča bude. Ali ja se sve bojin da te njihove ne lipe, nego grubo vele plaće, više vridu nego sve ono ča će ju oni za nas tamo učint. Za čelu ka je slabašna i lena i malo okolo po cveću leti, lipo se ono reče – da puno brnči, a malo meda daje. To se je potle govorilo i za onu žensku ka puno govori, njunja i bruntula – isto da puno brnči, a malo meda daje.

Više posla učint, a manje njunjat i bruntulat

Rab danas oglas

Ben, ma ako ćemo pravo ni lipo to samo ženskamin stavljat va pokoru, boj valja priznat da se to isto more i za naš muški reć. A da, boj ima puno i onih muških ki isto navelo okolo brnču, a malo meda daju. Da ne rečen kako se vajk puno takovih najde i gori va onomu našemu Saboru. E da, boj Sabor je isto jedna vela košnica va koj ima svega i svačesa, puno trutov, ali još više i onih ki puno brnču, a malo meda daju.

E, ali valja se pitat ako oće toga bit na isti mod i ovo ude kod nas na Rabu. Varamente, to ćemo još vit. Rano bi još bilo ča to o tomu govorit. Kako je da je, ma na ovima pasaniman izboriman zibrali smo mi i naše novo Grasko vijeće, a ovih dan bi se i oni mogli va svoju košnicu pokupit.

A koga smo mi to zibrali?

Dabome, mi smo ih zibrali da budu oni pravi, da budu one vridne čele radilice, a ne truti, oli nedaj bože oni i one ke puno brnču, a malo meda daju. E jušto zato vridi i znat ki su to naši novi težaci i težakinje va novomu Graskomu vijeću. Računan, da ste to već doznali, ali ja ću ih isto poimence i ovo ude spomenut, a to zato da ih zapametimo i da imamo navar ča činu i kuliklo ćeju posla učint va onoj svojoj košnici od Graskoga vijeća.

Evo ča smo zibrali. Od koalicije HDZeja i drugih, pasali su: Boris Bačić, Željko Dumičić, Marko Barčić, Martina Kordić, Darko Štokić i Elvis Grce. Pa unda od SDP-eja: Nenad Debelić, Damir Brusić i Ivana Stojanova. Od nezavisne liste Municipijum, zibrani su isto tri: Lovre Ševerdija, Marko Sandalić i Mirna Tomulić-Holjar. I još od Domovinskoga pokreta isto jedno novo ime, a to je Marina Beg Umiljenović.

Ki nan je vrag nabandal taj broj 13

I kad to zbrojimo unda ih je skupa 13. Ehe, a ki vrag je i nabandal taj broj 13 va biračko pravilo? A ča ni moglo bit 14, oli 15? Ne, nego jušto 13! A lipo svi znamo da naši ljudi još vajk viruju va one nesrićne čare. Ala šu, ma ne baš va one najgore, ali znan da niki ni dan-danas ne voli taj broj 13. Boj da je to nesrićan broj. Pa koga će nan unda vraga nesrićan broj odbornikov va našemu Graskomu vijeću.

Ovi prije njih su more bit i zato sami sebe raspustili, pa se lako more potrehit da će se i ovima to dogodit. Ali sve su to mladi i muderni ljudi, pa se nadan da oni ne viruju va čare, štrolige i nesrićni broji, nego da viruju va posal poradi koga su tamo i zibrani. A čital san i njihovi programi, pa mi je bilo drago da imaju i napridna mišljenja, da se držu onoga ča sve na Rabu triba učint i da manje računaju na karanja, a više na posal.

E jedino neka se ne ugledaju va onih va Saboru, boj tamo je zazbilja puno onih ki ljubu i grlu lipu plaću, ali na žalost, i onih ki najviše puno brnču, a jako malo meda daju.

Joso Fafanđel za Kantunić, 15.6.2024.