Rapski kantunić Josa Fafanđela | DAN GRADA NA DRUGI MOD

Inšoma, Prvi maj je već odavna pasal, a devetoga maja je Dan od Grada Raba. Program je pun svakojakoga slavlja, a ja bi otil tomu danu posvetit jušto štoriju od Prvoga maja, ali na drugi mod.

Dabome, prvi maja je neradni dan, a mladi ljudi imaju nauk jušto toga dana rasteć se malo po vanu, po prirodi, kako se ono reče, i va društvu malo gradele parićat, oli na kakovomu žalu, oli pod kakovu črniku gori po našiman Kantiman. Pa udri brigu na veselje, oli, kako se prvije ono govorilo da – Živio prvi maj!

Varamente, jedno vrime, ma odavna već, i moja se malo širja obiteljska kumpanija znala skupit na dan prvoga maja. A mi gori Kanti (na Frugi) imamo, ne tuju, nego i svoju velu črniku va jednoj našoj njivi va Cipelu, kako se jušto ta njiva i zove. I dokli su dica, nećaci, nučići a i drugi, još bili mlaji, oli mali, tamo smo se znali skupit svakoga prvoga maja. A mi veli imili smo nauk ne naložit oganj za gradele, nego malo veći, a diboto bi rekal – rastrižanj, za speć janjca na ražnju.

Pod črniku na katridi

I tako bi jedni od jutra sve to parićali i okritali janjca na ražnju, a cela kumpanija bi se pomalo kupila, pa i skupila dokli bi janjac bil pečen. A dica bi, a šnjiman i oni veći ali mlaji, po toj njivici isto tekli za balon.

Eto, tako je to bilo, a vi mi jedino morete zamirit da koga vraga o tomu pripovidan, boj da su i drugi okolo pod črnike isto pekli janjci i balali, a i zapivali, dabome. Je, to imate pravo, ali meni je jušto ta njivica na drugi mod za srce prirasla, kako se ono reče. Boj ja bi se pod črniku sel na katridu, pa bi gledal ne samo kako dica veselo balu nogadaju, nego bi pridase vidil tu njivicu i unakovu kakova je jedan put bila. Sada je zarasla va travu, dabome, ali ja je pametin i vidin i unakovu kakova je va pasana vrimena bila. A bila je to rodna zemlja, na koj smo sijali šenicu, pa malo i prosa, a potlije va novije vrime najviše bi se posijal hrmetun.

Veselo teć i balu nabijat…

Ča oću reć? Oću reć da je sve to tribalo najprije zorat, prvije z ralon i voliman, a potlije na plugo z traktoron, pa zausput posijat i zabranat. A potle kada hrmetun naraste, tribalo ga je naretko pogulit, i unda kopat, ča oće reć celu njivu z motikamin pasat, a med batva i malo fažola posijat. Pa unda još jedan put i zartnat. A kada glavice uzriju, bila bi krhatva: pokosilo bi se hrmetun i zasvin glavicamin na tovariman peljalo doma. To san otil reć, kako bi meni ta njivica sada za prvi maja bila i više od spize i balanja, boj bi mi tornivala uspomene od vrimena kada je ocu, materi, namin dici, a i blagu veli trud vazimala. A dica ka bi tekla za balon po njoj uvako va travu zarasloj, o tomu niš nisu znala, a na žalost, ne znaju ni danas. Njiman je bilo važno samo veselo teć i balu nabijat.

Inšoma, tako je to bilo, a ja ki san sve to proiživil, kako i moj brat i moja sestra, sve to uvik gledan na drugi mod. Boj onaj trud koga su te njive vazimale, i one Kanti i one doli po polju, to je zapravo bila vela muka i to nikad ne smimo zaburvit. Eto i zato o tomu govorin. Oću reć ne zato da se moja muka zna, nego zato da se va kup od života nidanjega stavu i muke svih drugih ljudi i famej ke su sve to na isti mod pasivale. Pa i muka od volov i tovarov, ki su bili veli težaci i ni bilo ni njiman lako vas taj trud po celi dan trpit. Boj tovari bi morali sve ča je rodilo još i doma popeljat, za ne reć, kako bi uza sve to još morali zausput i ku nogadu potrpit.

I zato evo; živio i dan Grada, komu želin sve najbolje, ali dajen i va zavet da pameti i sve te naše muke starinske i vas trud i žulji od naših pasanih vrimena.

Joso Fafanđel za Kantunić, 9.5.2024.

KRHATVA

Kasno je leto
A Kanat va žegi počiva
Masa tovar pod črniku miruje
Hrmentun se krše
Glavice lamaju
I brimena vežuju.
A potle ubeda
Va hladu
Popruzi se stišću i sedla šaldaju
Prtu se tovari i brimena vežuju.
Pa, ala cu!
Cu, doma! Cu!

A tovari se rivaju žveljto
Ki će sprida, ki će zada
Na pol puta brimena ih umoru
Pot ih kolo ušiju zaliva
Škalja leti i noge se zapliću
Brimena se lelaju,
Dižu se i ravnaju
Pa se jopet krivu
Kljatvine se čuju, bozi letu
I tovari se nogadaju.
Umorni ljudi,
Umorno blago
Žega pritišće, žaj ubija
A put neće kraju.
Noć pomalo pada
I ljudi i tovari
Sve težje se movu
Puno toga još more poć po zlu
Šuškaju brimena
I duron se jedino čuje
Ala cu!
Cu, moro! Doma, cu!

Iz zbirke pjesama "Otvoreni armerun" Josipa Fafanđela