Foto: RabDanas
Ne, ne želimo i ne ćemo ih zaburavit. Tužna priča otočića Trstenika dogodila se 27. IV. 1962. godine i od tad zapisana je va memoriju našega otoka Raba, a i Maloga Lošinja kadi su stradali učenici bili polaznici Ekonomske i Pomorske škole. Bila je to i moja generacija, a te godine i toga dana bil san kod moga strica, va školi va Osjeku. Va undašnjemu Vjesniku pročital san kratku vjest o tomu ča se je dogodilo. Pisal je samo broj stradalih, ali imena ni bilo.
Pametim dan-danas i za uvik kako san se zatekal priko jedne zelene derinice do prvoga grma va parku, rinul san se nutra da me niki ne vidi i gorko san na vas glas zaplakal. I ćutil san, kako va tomu istomu trenu i celi moj Rab plače skupa s manon.
Va neveri uz sami otočić Trstenik utopilo se 16 ljudi, a samo tri su se spasili: Nataša Valovičić (Tijan), Marica Matić (danas nažačost već pokojna) i Marijan Pičuljan.
Puno godin potlije pital san prijtelja Marijana kako se je to dogodilo? Rekal mi je uz ne puno besed: Ma, partili smo od Lošinja doma na Rab jušto po bonaci. Zato se va mali kaić od šejst metri i ukrcalo puno nas. Stiskali smo se i muški i ženske jedni uz drugoga, bili smo veseli i radosni ča gremo doma. Praćeni uz buku mutora, na moru smo svi skupa i zapivali. Kod Trstenika latila nas je gruba i nagla nevera, kaić se je zvrnul i potonul, a mi smo se našli va paklu. Srića je pomilovala samo mene, Maricu i Natašu. Sve druge pokrilo je more…A ča da ti rečen, partili smo doma uz pismu i veselje, a najviše njih, na pol puta, more je pokrilo. Kobno i za uvik…
Da, baš je tako i bilo. Plakalo je puno očiju, tuga se je zavukla va celi Rab. Bilo je teško, sumorno i bolno, svidočilo je puno od njih, a puno od njih još svidoči i dan-danas. Svidoči i Nataša ka na upit teško more izgovorit više od tri rečenice. Stišće je grč va grlu, a suze brzo zamagle oči… Neka Nataša, sve je to tako ljudski.
Priču o svemu tomu zapisal je potle va stihovima Lošinjski pučki pjesnik Nikola Pinčić, danas na žalost i un pokojni. A na Trsteniku uzdiže se danas samotni i pomalo tajnoviti spomenik ki na svoj način nudi žalosnu priču o sudbini jedne mladosti. I ča još reć nego – spomin na njih neka traje za vike vikova.
Joso Fafanđel za Kantunić, 27.4.2024.
Napomena: Komemoracija na Trsteniku održati će se 29. travnja ove godine. Brod za Trstenik isplovit će iz rapske luke u 9 sati.
