Foto: Ilustracija: H.H.
Inšoma, proliće se navelo budi, sve raste i zeleni se, a i tići već pivaju svoje prolićne pisme. Jo, ma šćeto ih je lipo i čut, kada je vrime tiho, bez vetra, a tići pivaju okolo kuće, oli malo dalje po gušću.
Dabome, namirno govorin da je to lipo za čut, boj mi ljudi ovih dan manje slušamo lipe pisme od tići, a više virimo va teleivziju i slušamo parole od izborov. Ala šu, i to se mora, boj već 17. ovoga nas tuka i na izbori poć i zibrat novu vlast. Namirno spominjen i novu vlast, boj vajk je dobro kada se med oni dosadašnji zamiša i ča to novoga. Oštija, a zato i jesu izbori, da narod bira onih ki će ih najbolje peljat va bolje. Makar meni ni drago da me bilo ki pelja za ruku i da mi tupi svoje kako da ja, a i svi mi, nimamo svoje glave za mislit.
A dabome, ne mislimo svi jednako i isto, a i nebi bilo ni lipo da je samo tako, ma isto moramo stavit pamet va glavu i malo proštudijat prvije nego stavimo kružić na niko ime. Boj puno od njih čujen govori kako njih pulitika ne zanima, da oni to nimaju navar i da samo okriću glavu od toga. Oštija, rečen ja unda, a naki mod ćete unda glasat kada to nimate navar. Moraš malo i poslušat ča ki govori.
– A koga vraga ću poslušat, znaju mi reć niki nato, kada svi samo lažu. Ma svi redon do jednoga!… Svi su isti!
– E, a unda ni druge, rečen in jopet ja, nego morate baren zibrat ono ča van se čini manje lažljivo. Ono kako su naši stari znali govorit, tobože, da od dva zla triba vajk zibrat ono manje.
Domišljan se kako su jedni izbori bili, pari mi se 2015. godine, a spominjen ih zato boj su te godine bili va trećemu misecu, va marču. I sve da se je dogajalo i uz onu prvu ma jaku marčenu buru ka je grubo bumbrezala i sve živo posolila. A mi Rabljani ki se volimo o svemu sulacat govorili smo unda da je to dobro ča je bura izbori posolila, boj da se more dogodit da unda i namin i oniman ki su na listićiman isto bura malo i pamet posoli. A drugi su jopet, rugajuć se, njurgali da ki in je vrag dal napamet da se izbori držu va marču misecu. Da ča oni gori ki su to odredili ne znaju da je misec marač vajk bil munjen, inšempijan i ludi misec, pa da se unda lako more dogodit da i mi ziberemo, ala šu, ako ne već munjenu, ali baren malo inšempijanu vlast. Pa su jedni potle tih izborov i njurgali da nan se jušto tako i dogodilo. Eto, ali da nismo mi za to njanci malo krivi, nego da je bila kriva ona luda bura i još puno luđi marač.
Ben, ma to govorin i zato boj ove godine su oni ki o tomu odlučuju sve dricali za jedan misec napvo. Tako da evo, izbori nisu va ludomu marču, nego na polovici tobože od pametnijega aprila. To pari da sada moremo na miru glasovat i da nas nećeju smućevat ni marčene bure, ni ludi marač. To je varamente lipo za čut. Pa još ako unda pravi i ziberemo, e to će unda bit puna šaka brade i država će poć z veliman koracima naprvo. Samo ča ni dobro ni tako jako veli koraci čint, boj se lako more dogodti da prekoračimo i Njemačku i Francusku, pa priko njih zagazimo drito va ocean, va ono dumboko i jako velo morinje.
Zato nebi škodilo da i ove srede jedna šesnija bura zapuše, pa da nan isto, a baren malo i pamet posoli. Da, a nikomu ne škodi malo više soli va glavi.
Josip Fafanđel za Kantunić 14.4.2024.
