Foto: Hrvoje Hodak
Počala je škola pa se o tomu puno i po televiziji govori. Ali to je već, kako naši ljudi reku, višlja pulitika pa neću o tomu, nego imamo mi škole i doma, ude na Rabu, pa se je bolje držat svoga dvora.
A ča san ono otil reć? E da, valja pofalit malo i naše domaće školstvo. Varamente, ne školstvo ne, nego školu kako kuću. A znate već i sami da je ove godine šal va pogon onaj drugi del novo učinjene škole. Ono krilo tamo do igrališta Blato. Pofalit to triba zato boj lipo je imit više tramita va našiman školamin, a da ne rečen kako je lipo i to da će dica va školu hodit va jednoj, a ne va dvi smene.
A volu to i nastavnici, dabome. Jušto san jednu nikidan kuntral va jednoj butigi, pa je pitan da kako je, a ona mi odgovara: Odlično, evo jušto gren doma od kupanja. A škola? -pitan ja nju. A ona mi govori, da potle otvranja ovoga novoga dela od škole, da je i njiman laglje. Evo, danas san slobodna, a zutra gren na posal ali samo popodne.
Eto, vidite, nati mod je i školantima laglje. A da ne govorin da je nova kuća-nova kuća, pa je i sve urednije i bolje opremljeno zonin ča za učenje triba. I sve se ja unda mislin, da kakove ćeju sada davat ocjene školantima? Boj, do sada da su, a diboto, svi dobivali petice, ono tobože – da sve pet! A ča će ju sad? Veće ocjene od pet nima, pa se lako more dogodit da sada zmislu još jednu. Ne samo pet, nego za veće znanje, tobože – još i šejst.
A sulacan se malo, a ča ću drugo. Ben, ma otil san zapravo reć da potle otvaranja toga novoga dela od škole, da se već kolo toga čuju i ćakule. Kako prvo da je priz školu veli promet od auti i da je jako opasno skrcivat i ukrcivat dicu na sre ceste. A cesta je dvosmjerna pa se puno od njih boji da bi se tude mogla, nedaj Bože, i kakova dežgracija dogodit. A i zbande do igrališta da je isto puno manje mesta. I ča ćemo sad?
A nećemo valjda taj novi del škole nanovo rastakat. Ma ni straha neće se to dogodit. Oštija, kada onaj šef od Elektropirvrede neće da obali onu svoju bespravnu kuću na Hvaru, e nećemo brate ni mi našu školu obalit. A ne!
E, ma isto malo strahujen da će nan škole sve manje na Rabu tribat. Da, boj ima jedna stvar ku ni baš jako lipo za čut. Ča se dogaja? Širimo mi škole, varamente ne svajdi, boj onu va Banjolu čujen da oćeju i zatrt kako školu, ali širi se zato ona Gradu.
Da, škola se širi, doziđuje, ali prvašićev da je ove godine manje nego do sada. To san pročital pa me je jako znenadilo. A grubo je i pisalo, tobože da nikad manje prvašićev na Rabu! Grubo za čut, ali da je jušto tako. Va osmoljetke na Rabu da je po prvi put upisano samo 56 malih prvarićev. Va glavnu školu Gradu da je upisano njih 32. Tako da ćeju sada učint dva razreda, a va svakomu da će bit 16 prvarićev.
Jo, ma kad mi samo pade napamet kuliko je nas bilo va moje vrime. Jedva bi stali va razred! A kad nas je vani na dvoru pok. Strabić otil slikat, stal bi jako daleko od nas da mu svi moremo stat va onaj njigov starinski aparat.
A danas po školamin gre uvako – va Banjolu da je upisano njih 6 novih, va Brbatu 3, va Loparu 5, Kampori 8, Mundanije 2, a va Drazi ma njanci jedan jedini.
Jo, ma da to more vit pok. Strabić, un nebi otil doć ni Kampor slikivat oni 8, a kamoli oni dva, oli još gore oni tri va Brbatu. Oštija, a tribalo je unda i doć do Brbata, za slikat samo tri prvarića. Slaba je to zrada, dabome. A za Dragu, a neznan ča bi mogal i reć. Kadi su mladići i divojke, kadi su mladi, ča se to dogaja? Oli se danas priko mere more vit svakojake golotinje, pa više mladih ni taj posal ne interesira.
Uza sva ovozemljska čuda, lako more bit da se i to pomalo dogaja.
E da je va moje vrime bilo imit lipe kuće, lipi auti i lipi kaići s postiljamin va kabini, bilo bi i duplo više prvrićev nego ča ih je unda i bilo. Altroke danas! Pu vraže kvargu! Ma ni nego za križat se – i to z livon rukan!
Za Kantunić Josip Fafanđel - 1.10.2023.
