A kako i vajk pitan se da ča reć za ovaj štajun od godine? A moglo bi se reć i za ovu pasanu šetemanu, varamente. Da, boj jušto ova pasana šetemana je na niki mod i tračila ovomu štajunu. Bilo je i sunca i teplinje, bonace i ćarece, a bilo je i vetra, malo juga pa i bure, a da ne govorin da je lipi del i obrosilo.
Piše: Josip Fafanđel
A ča je najvažnije, niš na silu nego je sve to bilo po onomu redu, redu od prirode ka nas pomalo pelja va ovogodišnju jesen. A i vrime je, oštija, boj evo, a diboto smo na polovici od desetoga miseca. Grozje se je odavna pomalo naručevalo, a šerval san da su se na Rabu već i lambici nagorili, pa će bit i rakije – malo za gosti, a malo i za po zimi se okripit kada bura zapuše i bude malo mrzlije po prstiman. Ali isto valja reć kako je ovo dosta tepal štajun od ove godine. Ča ni njanci za čudit se, boj ovoga leta je ben bilo teplinje, grijali su nas ala vraga, pa ki bi i more i zemlju tako na prešu ohladil.
OGLAS
OGLAS
I eto, kako da su sve to i lastavice naćuhale, pa se ni njiman neda poć ća od nas. Još ih šervivan kako po nebu letu i spretno navigaju za mušicamin po zraku. To pari da je i njiman još teplo za ude stat. A i bolje in je nego poć doli na jug, kadi varamente je još i teplije, ali se duron ratuje, kako oni medase, a sada je još i onaj munjeni Trump nabandal svoj rat. Da, ma kod drugoga ne migo kosebe. A lako more bit da lastavice i to znaju pa stoju ča više ude kod. Ne da in se poć tamo kadi se duron puca, ruši, a i ubija na velu žalost. A ča se more, kada su danas od čovika i beštije pametinje.
A druga beštija ku san ovih dan na Rabu šerval (kolo naše kuće, dabome) to je ona već znana mala tica pitirina. Ona se ne parićiva za poć ća, nego ona va ovomu štajunu od godine gre nazad ude kod nas. Ona se zove čučka crvendać. Eto, a mi je po domaću zovemo pitirina. Ma lipo ime, jušto kako ča je i tičica lipa. Jedni govoru da su one i po leti i po zimi kod nas na Rabu. A ja tvrdin da nisu, nego da po leti idu priko mora na kopno. Na drugojačiji mod od lastavic. Lastavica po leti gre vamo, a pitirina gre ća. Pa unda lastavica na jesen gre ća, a pitirina gre vamo. A ni ona ni šordava, boj ude kod nas na školju je zimi puno teplije nego gori va Velebitu. A rekal san već da su i beštije pomalo sve pametnije nego mi. One ne činu puške i ne pucaju jedne na drugih. Ali mi da, ne samo da činimo nego i pucamo – i po namin i po njiman.
LAMBIK
Da, da – latasvicu i pitirinu vidil san zgora i kolo kuće doma, ali vidil san ja i lambik. Najprvo na sliki onaj loparski, a unda na živo i onaj banjolski. To se je moj nećak Sanjin namural va lambik, pa ga svake godine ovo doba muntira va garaži uz kuću. A mene to jako veseli, boj i ja san se na svoj mod va njega namural. A računan da i znate ča je to lambik, makar se jako bojin da to dananšnji mladi slabo znaju. E jušto zato ću samo reć kako je to kotal za kuhat rakiju. Ali nima un samo kotal nego i kapu i hogun za ložit i katicu punu vode za hlađenje rakije. A ja san se na svoj mod namural va lambik zato, boj je njega imil i moj otac. Još kad san ja bil mali nabavil ga je un, pari mi se, gori va Bribiru, pa je unda šnjin kuhal rakiju ne samo doma nego i drugiman okolo po kućamin. A bilo je unda puno i trsja i paćac, pa se je rakija kuhala ne samo po danu nego i po noći, duron – nebi se lambik gasil. Kada bi ga se nagorilo, ma kako da si japljenicu nagoril, boj i ona se je ložila duron i dan i noć.
A pametin i to kako je kuhanje rakije bila i jedna sorta zabave. Misto da su ljudi večer hodili va kafić, kako danas, oni bi se kupili kolo lambika. Ja to još kako dite pametin i ne moren zaburavit one starinske ćakule ke bi se tamo povidale. Od ćakul domaćih, do bajki o kraljeviću i lipoj kraljici, oli o siromašnomu mladiću ki bi se va nju zaljubil. A sve je to namin dici bilo lipo za čut, pa bimo se i mi stiskali kolo lambika med stariji ki bi pušili i ćakulali, a znali bi ki put i dobar prdac pustit. Čujen da se i danas to zna dogodit, ali jako naretko. Pugotovo ne po noći. Rakija se danas kuha za dana, a po noći se gre na televiziju, unda se potle rinut va teplu postilju kod žene, oli divojke. Pa se ki put i ča onoga drugoga potrehi. E da, isti lambik, isto kuhanje, a druge užance.
MASLINE
A kada već govorin o lambiku, unda mi dojde napamet, da jopet moran spominjat onoga moga suseda. Ma ovih dan gledan ja njega na dvoru kako pod špinu pere one bele kante od jupola. Šuška un i kuči šnjiman, a ja ga unda zezan da ča nima posla nego se igra s kantamin?! A un me je pogledal pa mi ozbiljno govori:
– Ma ča ti znaš, za svaki posal valja se na vrime parićat!
A koga će mu vraga čiste kante, mislin se ja, nego za masline brat.
– Znači, ti se već parićivaš za masline pobrat?, nato ću ja.
– A nego ča si mislil, brzo će i to vrime arivat.
Dabome, ja nato nisan ni pomislil, boj jušto san dan prije bil malo va patroli za masline obać, pa san šerval da su i njigove jako lipo rodile. Ali sve su još i jako zelene, sve unako jednake kako jedna pa ih je šćeto lipo i gledat. A kada se začmu zrijat i šarat, još će ih bit i bolje za vit. A to ovi novi muderni maslinari jušto i čekaju, da se malo začmu šarat, pa unda skale van i na branje navalit. A masline i više nego napol zelene. A ja se unda mislin, ma da in to moru vit pokojni oci, a još više i dedi, kakove masline beru, ja mislin da bi nanovo od jada umrli. Takov je bil i naš pokojni otac. Nedaj bog da bi se masline brale ako nisu sve redon uzrijale. Od zelenih moraju se sve va one lipe škure pretvorit, moraju do jedna uzrijat. A Bože moj, vridi za to ona ista ćakula kako i kod lambika, novo vrime pa unda i nove užance. A mladi se smiju ča mi to govorimo, tobože, da masline moraju uzrijat. I rujgaju nan se kako su arivala vrimena kada se mora i struku slušat, boj da oni znaju ča govoru. A naše znanje da je starisko, zaostalo i nikakovo. Ma ni se lipo kuntra tomu ni jako puntivat, boj sve je moguće, pa i to more bit istina. Ali za mene je najveća istina kada mi ovi mladi dadu svoja ulja za kušat. Tobože – kušaj malo pa ćeš vit ča je ulje! I kušan ja, dabome, ali va ustiman ni one slasti od ulja ku san zapametil, supajuć komad kruha va ono nidanje ulje od našega pokojnoga oca. Ne, to ni to i gotovo!
A kada već spominjen domaće ulje, unda moran reć da naši stari nisu ulje činli va uljari, na onomu čudu od makine, nego doma va konobi. Na dva moda, oli gazeć po vrićici, ča je najstariji mod, oli na kargu. Gazeć po vrićici značilo je bose noge pa gazi, uz vruću vodu svako to malo. A ono na karag se potle zmislilo. Dugi drveni jarbul, okrugli dabome, bi se puntal va bužu na zidu od konobe, zgor maštela i unda bi se kargalo taj jarbul na vrićicu i tako je gnjavilo. Dabome, isto uz puno vruće vode. I uz zrele masline, to ulje ni moglo bit nego dobro. E, ali govoru ovi mudraci, da ni bilo zdravo, boj da je sve od masline, a ča ni zdravo, hodilo va ulje. A ja nato rečen: a ča mu je i činlo onaj ukus i buket, nego sve to ča je va zreloj maslini i bilo. A danas da te muderne makine znimlju va lauranju centrifuge sve van ono ča va maslini ne valja.
GUŠT
Lipo je to za čut, ali ja tvrdoglavi tovar, i naprvo govorin da se tako zneme van i sve ono ča ulju daje onaj veli gušt.
Ben, ma to san već malo prvo rekal, nego san otil reć da se danas na sličan mod dogaja i z lambikon, kada se rakija kuha. Sve se radi po redu kako i prije, va ono starinsko vrime. Najprije pajca, pa kuhanje va lambiku i dabome, gre van rakija. Ali nanovo se ono isto dogaja, kad se rakija kuša, jopet to ni onaj gušt kako je jedan put bilo. A grozje je grozje i ovo kupljeno je grozje. Ala šu, ovo naše na školju je baren zeru zasigurno bilo bolje. Ben ma ča se dogaja, kupljenoga grozja je malo, a svi bi otili dobit ča više rakije. I dabome, unda triba ča više cukara trabukat i zamišat va pajca, pa i rakije bude više, ma rakije od cukara, a ne od grozja. A na isti mod se i vino čini. Malo grozja, a puno cukara, pa se učini otrov, a ne vino. Zato ja vajk volin i ono spominjat, kada bi naš otac dal na dvoru znanomu šaljivčini Antu Boljharu, pot vina za napit se, un bi pot z gušta nagnul i nategnul puno guti na tir, pa bi pot kalal, gušno bi zdahnul, otrl bi usta i rekal: E Slavo moj Slavo, ma ča ja volin ovoga tvoga lupeža!
Piše: Josip Fafanđel Pripremio (foto): Hrvoje Hodak
OGLAS
OGLAS
